Në emisionin Opinion është diskutuar në lidhje me çmimet e larta të produkteve ushqimore, duke analizuar shkakun e kësaj rritje e duke i krahasuar ato me vendet e rajonit apo të Europës. Për të folur në lidhje me çmimet në studio ishte i ftuar edhe Gjergj Bojaxhiu.
Përveç faktit se çmimet janë të larta, tha Bojaxhiu, shqiptarët preferojnë të marrin një produkt të ardhur nga jashtë vendit që mund të jetë më i shtrenjtë pasi nuk kanë besim te kontrollet e instiucioneve të vendit.
“Ne kemi zero besim tek institucionet tona shtetërore. Jo pa të drejtë. Ne mendojmë se në Shqipëri ushqimet tona nuk janë cilësore, nuk janë te kontrolluara. Dhe, ai çmim ekstra që ke atje, është pagesë për frikën. Ti e blen më shtrenjtë, se kur e di që vjen nga Italia, ke të paktën siguri. Ajo shtresë që e ka mundësinë, se jo të gjithë e kanë mundësinë, ajo shtresë, paguan ekstra, vetëm për sigurinë mendore”, tha ai.
Bojaxhi shprehet se në vendin tonë ka “përplasje” midis prodhuesit e konsumatorit, duke sjellë si shembull humbjet e fermerëve në vend me prodhimet e tyre, si dhe konsumatorët që përfundojnë duke blerë këto produkte, të importuara, e me çmim më të lartë.
“Ajo që unë shikoj, është se ne jetojmë në një vend me paradokse. Nga një anë, ne kemi fermerë që nuk shesin dot mallin sepse nuk u del kostoja, çmimi. E hedhin mallin, u prishet, sepse çmimet janë shumë të ulëta dhe ata nuk prodhojnë dot për ta nxjerrë me atë çmim në treg. Nga ana tjetër, ne kemi konsumatorin, të paktën një pjesë të konsumatorit shqiptar, që përfundon duke paguar çmime shumë më të larta seç ka rajoni, e shumë më të larta”, tha ai.
