Një 33-vjeçar është arrestuar nga policia pas sherrit me një person në Gjirokastër.
Por duket se nuk ka mbaruar me kaq. Në momentin e shoqërimit ai ka kundërshtuar punonjësit e policisë dhe më pas ka shkatërruar edhe kamerën e sigurisë në dhomën e shoqërimit në Komisariat.
33-vjeçari, O.C., akuzohet për veprat penale “Kundërshtimi i punonjësit të policisë së rendit publik” dhe “Shkatërrimi i pronës”.
“Kundërshtoi punonjësit e Policisë dhe shkatërroi kamerën e sigurisë në dhomën e shoqërimit në Komisariat, vihet në pranga 33-vjeçari. Specialistët e Seksionit për Hetimin e Krimeve në Komisariatin e Policisë Gjirokastër arrestuan në flagrancë shtetasin O.C., 33 vjeç, banues në lagjen Cfakë, Gjirokastër.
Ky shtetas, gjatë një konflikti me një shtetas tjetër, në lagjen “18 Shtatori”, Gjirokastër, ka kundërshtuar punonjësit e Policisë të cilët kanë ndërhyrë për të parandaluar përshkallëzimin e konfliktit. Pasi është shoqëruar në ambientet e Komisariatit të Policisë Gjirokastër, 33-vjeçari ka shkatërruar kamerën e sigurisë në dhomën e shoqërimit.
Materialet në ngarkim të shtetasit O.C. i kaluan Prokurorisë pranë Gjykatës së Shkallës së Parë Gjirokastër, për veprat penale “Kundërshtimi i punonjësit të policisë së rendit publik” dhe “Shkatërrimi i pronës”, njofton policia./Opinion.al
