Sekretari i Përgjithshëm i Partisë Demokratike, Gazment Bardhi, ka reaguar pas ndryshimeve të fundit të kryeministrit Rama në qeveri.
Përmes një postimi në rrjetet sociale Bardhi i cilëson këto ndryshime si riciklim të të korruptuarve, duke theksuar se kryeministri Edi Rama është një dështim, pasi sipas tij në tetë vite në qeveri nuk ka bërë asgjë.
Nuk ka ndryshime në qeveri, ka riciklim të të korruptuarve për shkak të luftës mes klaneve në pushtet. Edi Rama është i lodhur, i vjetëruar, pa ide, pa ekip dhe i pafuqishëm për të ndaluar këtë luftë që dobëson ekonominë për interesa privatë. Në vend që të ndihmojë financiarisht dhe të rrisë punësimin për shqiptarët, Rama u siguron punë vetëm miqve të tij.
Edi Rama është një dështim. Ai është i paaftë të ndryshojë gjërat dhe vazhdon të bëjë keq e më keq. Vendit nuk i duhen arnime të vjetëruara, por i duhet ndryshim. Prej 8 vitesh Edi Rama ka ofruar veç dështime dhe një qeveri që kujdeset vetëm për veten.
Mjaft më! Është koha për të sjellë ndryshimin dhe shpresë të re në Shqipëri. Është koha për të zgjedhur një qeveri që kujdeset për njerëzit, jo për veten e saj”, tha Bardhi.
Më herët kryeministri Rama njoftoi se Gent Cakaj ka dhënë dorëheqjen nga posti i Ministrit të Jashtëm në detyrë dhe në vendin e tij është emëruar Olta Xhaçka, ndërkohë që ministri i ri i Mbrojtjes është caktuar Niko Peleshi./Opinion.al
