Çështja e ndërrimit të kufijve mes Kosovës dhe Serbisë ka qenë një prej temave më të diskutuara në muajt e fundit të viteve që lamë pas, por a ka realisht një plan të tillë?
Për këtë e për çështje të tjera që kanë të bëjnë me Kosovën, në studion e “Top Talk” në Top Channel ka qenë e ftuar Edita Tahiri, ish-ministre e Punëve të Jashtme të Kosovës si dhe ish-kryenegociatore e dialogut me Serbinë.
Sipas saj, kjo ide ka dalë nga axhenda serbo-ruse, e në mënyrë kategorike, duke renditur e një sërë argumentesh, ajo thekson se një gjë e tillë nuk mund të ndodhë.
“Një ide e tillë ka dalë nga axhenda serbo-ruse. Nuk ka plane dhe as mund të ketë. Thaçi e ka promovuar, por pjesa tjetër është e kundër. Nuk mund të ketë ndryshime të kufijve. E para sepse Kosova për t’u bërë shtet ka luftuar për 100 vite. Duke përfshirë edhe luftën e fundit 10-vjeçare të LDK. Ne si LDK kemi qenë partia që projektoi Pavarësinë. Ka qenë një opsion kompromisi, sepse ne na takonte që të bashkoheshim me Shqipërinë. Nga ana tjetër edhe UÇK ka bërë të njëjtën luftë. E dyta Gjykata Ndërkombëtare për Drejtësi e ka vërtetuar se Pavarësia e Kosovës është e ligjshme. E treta, ne kombi shqiptar, historikisht kemi tkurrur tokat. Hera e parë që ne bëmë dy shtete. Kur kemi bërë këtë arritje gjeo-politike, ne na duhet që t’i zgjerojmë më tutje, sepse jemi të ndarë në 5-6 shtete. Jo më të japim pjesën më të pasur të Kosovës”, -u shpreh Edita Tahiri.
Për të, ideja e shkëmbimit të territoreve mes Serbisë dhe Kosovës është e gabuar. Në studion e Top Talk, ajo shprehet se nuk e ka të qarta se përse Presidenti i Kosovës Hashim Thaçi e kërkon një gjë të tillë, por Edita Tahiri thekson se një e tillë është e gabuar.
“E para sepse dhënia e veriut në këmbim të Luginës së Preshevës, është këmbim i tokave shqiptare. E dyta sepse jepet zona më e pasur e Kosovës. Trepça, miniera më e pasur sot për sot në Evropë. Si dhe Ujmani”, -tha ajo.
Sipas saj, një ide e tillë që vjen nga axhenda serbo-ruse synon realizimin e Serbisë së Madhe.
“Ky është një plan serbo-rus për të realizuar Serbinë e Madhe. Beogradi e ka marrë gjysmën e Bosnjës, vetëm formalisht nuk është bërë, sepse realisht ia ka arritur. Me këtë kërkon që të kthejë sundimin serbo-rus në Ballkan”, – tha Edita Tahiri.
Kujtojmë se një marrëveshje gjithëpërfshirëse për normalizimin e marrëdhënieve ndërmjet Kosovës dhe Serbisë, është kusht për të dyja vendet për integrim në Bashkimin Evropian. Por, ende është e paqartë se çfarë mund të jetë ajo marrëveshje dhe çfarë janë mundësitë për arritjen e shpejtë të saj. Edhe në Beograd edhe në Prishtinë, bartësit e këtyre bisedimeve thonë se kanë pak shpresë për të.
