Pas më shumë se dy muajsh shqyrtimesh teknike, verifikimesh dhe debatesh ligjore Komisioni Qendror i Zgjedhjeve shpalli ndarjen përfundimtare të mandateve për qarkun e Tiranës.
Komisioni Qendror i Zgjedhjeve shpalli të mërkurën (23.07) ndarjen përfundimtare të 37 mandateve për qarkun e Tiranës, në përputhje me rezultatin e zgjedhjeve parlamentare të 11 majit 2025. Vendimi i kryekomisionerit Ilirjan Celibashi , i cili zyrtarizoi përbërjen e deputetëve që do të përfaqësojnë kryeqytetin në legjislaturën e re erdhi pas më shumë se dy muajsh shqyrtimesh teknike, verifikimesh dhe debatesh ligjore mbi interpretimin e listave.
Sipas vendimit të KQZ-së, Partia Socialiste ruan shumicën në Tiranë me 19 mandate, ndërsa Partia Demokratike si pjesë e koalicionit “Aleanca për Shqipërinë Madhështore” konfirmon pozicionin si forca e dytë më e madhe në kryeqytet, me 13 mandate.
Përtej dy partive kryesore, harta politike e Tiranës pasqyron rritjen e fragmentimit të përfaqësimit në Kuvend. Partia “Mundësia”, një forcë e re politike, siguroi 2 mandate, ndërsa me nga një mandat përfaqësohen Lëvizja Bashkë, Partia Socialdemokrate (PSD) dhe koalicioni “Nisma Shqipëria Bëhet”.
Përplasjet për mandatin brenda koalicionit “Nisma Shqipëria Bëhet”
Përplasja brenda koalicionit “Nisma Shqipëria Bëhet” për mandatin e vetëm të fituar në Tiranë u mbyll këtë të mërkurë, me vendimin e KQZ-së për t’ia dhënë atë Kleana Xhuvelit, kandidate nga partia “Shqipëria Bëhet”.
Ky vendim erdhi pas një procesi të zgjatur me interpretime të ndryshme ligjore dhe mosmarrëveshje brenda koalicionit, i përbërë nga dy forca politike “Nisma Thurje” dhe “Shqipëria Bëhet”.
Sipas një marrëveshjeje të brendshme të nënshkruar përpara zgjedhjeve, kandidatët e listës së mbyllur kishin deklaruar paraprakisht dorëheqjen nga mandati, për t’i hapur rrugë kandidatëve të listës së hapur, nga të cilët më i votuari rezultoi Adriatik Lapaj. Por KQZ rrëzoi këtë pretendim, duke argumentuar se dorëheqjet e nënshkruara para miratimit zyrtar të listave nuk kanë vlerë juridike.
“Nuk ka dorëheqje nga kandidimi pasi listat janë miratuar. Kjo është e qartë në Kod dhe është kështu për çdo lloj shkaku apo motivi” – u shpreh Celibashi.
Situata u komplikua më tej kur kandidati Zeqir Kordhoni, renditur i nënti në listën e mbyllur dhe i afërm me bashkëdrejtuesin e koalicionit Endri Shabani paraqiti kërkesë për të marrë mandatin e deputetit. Meqë disa prej kandidatëve më lart ishin tërhequr, mandati përfundoi te Kleana Xhuveli, e katërta në listë.
Ndërkohë, edhe Partia Socialdemokrate (PSD) e drejtuar nga Tom Doshi, zgjodhi të tërhiqte të gjithë kandidatët nga lista e mbyllur, duke ia hapur rrugën kandidatit më të votuar në listën e hapur. Si rezultat, mandati i vetëm i PSD-së në Tiranë i kaloi Tedi Mulës, një 30-vjeçar që siguroi rreth 2.500 vota preferenciale dhe kryesoi listën e hapur të kësaj force politike.
Me shpërndarjen e mandateve për Tiranën, përmbyllet zyrtarisht procesi i ndarjes së vendeve në Kuvendin e dalë nga zgjedhjet parlamentare të 11 majit 2025.Fotografi: Olsi Shehu/Anadolu/picture alliance
Kuvend i ri po me shumicë të njohur
Me shpërndarjen e mandateve për Tiranën, përmbyllet zyrtarisht procesi i ndarjes së vendeve në Kuvendin e ri që del nga zgjedhjet parlamentare të 11 majit 2025. Partia Socialiste fitoi 83 vende, Partia Demokratike në koalicion me “Aleancën për Shqipërinë Madhështore” siguroi 50 mandate, ndërsa forca të vogla si PSD fitoi 3 mandate, Partia “Mundësia” vetëm 2, ndërsa Lëvizja Bashkë dhe koalicioni “Nisma Shqipëria Bëhet” plotësuan përbërjen parlamentare me nga 1 mandat secila.
Ky ishte votimi i parë që u zhvillua sipas ndryshimeve në Kodin Zgjedhor të miratuara në vitin 2024, të cilat sollën një model të kombinuar me lista të mbyllura dhe të hapura. Në zgjedhjet parlamentare të 11 majit morën pjesë rreth 44.8% e votuesve të regjistruar në Shqipëri. Për herë të parë u përfshi edhe diaspora, ku 191 mijë shqiptarë jashtë vendit dorëzuan fizikisht votën./DW
