Mbrëmja e ndërrmit të viteve fatmirësisht nuk është shoqëruar me incidente, ndërsa e qetë duket se ka nisur edhe dita e parë e vitit 2022.
Drejtori i Përgjithshëm i Policisë së Shtetit, Gledis Nano ka dalë në terren pak momente pas ndërrimit të viteve, ku ka inspektuar shërbimet e Policisë dhe ka ndarë një komunikim me gazetarët.
“Fatmirësisht ky vit ka filluar me këmbë të mbarë, është e vërtetë që është një vit ndryshe dhe kërkohen masat anticovid, por siç i shikoni të gjithë njerëzit që po festojnë janë të gëzuar dhe une i uroj të gjithëve një vit të mbarë, të shëndetshëm dhe shumë të suksesshëm”, tha Nano duke kujtuar rikthimin e orës policore, pas heqjes së saj në natën e ndërrimit të viteve.
“Në ditët në vijim situata do të kthehet në situatën normale dhe shërbimet e Policisë do të vazhdojnë shërbimet e tyre si i kanë kryer dhe më përpara, kështu që nuk presim ndonjë ndryshim të madh, të gjithë qytetarët e dinë sesi duhet të sillen në raport me masat anticovid dhe me shërbimet që kryen Policia, ashtu dhe me orarin e përcaktuar dhe për këtë do të ketë dhe njoftime nga ana jonë”, u shpreh Nano./Opinion.al
