Naftëtarët e Ballshit kanë hyrë në ditën e tretë të grevës së urisë, pasi kërkojnë pagat e prapambetura dhe të fituara me gjyq që në vitin 2017, megjithatë ende nuk kanë marrë një reagim ose përgjigje zyrtare.e
Grevën pa afat e nisën një përfaqësi prej 10 personash. Së fundmi, njëri prej tyre është tërhequr pasi ka pësuar rëndim të gjendjes shëndetësore, por është zëvendësuar menjëherë me një tjetër naftëtar.
Po ashtu, në mbështetje të protestës së tyre janë bashkuar dhe punonjës të Poçemit, të cilët pretendojnë se janë gënjyer nga qeveria në lidhje me pagat e tyre.
Ndërkohë, kreu i Sindikatës së Naftëtarëve, Sokol Dautaj, tha se deri më tani askush nuk ka reaguar, ndërsa pronari i kësaj rafinerie është zhdukur.
“Deri tani nuk ka asnjë përgjigje. Ne duam që të jepet një përgjigje, qoftë dhe negative. Por thanë deri dje se është privati. Ne na ka humbur pronari. Shteti duhet të gjejë pronarin. Ne ndërhymë për pagën e luftës, pasi nuk aplikonte pronari. Me anë të një VKM që nxori kryeministri, u bë e mundur që të na kalohej për 900 familje naftëtarësh një pagesë prej 400 mijë lekësh si pagë lufte. Kjo është pasuri kombëtare, shteti duhet të ndërhyjë!”, tha Dautaj.
Kujtojmë se janë 505 punëtorë janë kanë 16 muaj paga të prapambetura që nga vitit 2016. Ngërçi i krijuar me këto pagesa lidhet me faktin, që rafineria e Ballshit ka ndërruar një sërë kompanish dhe administratorësh përgjatë viteve të fundit, ku askush prej tyre nuk ka marr përsipër detyrimet e punonjësve./Opinion.al
