Presidenti i Republikës Ilir Meta ka mbërritur mbrëmjne e sotme në Kavajë pranë zyrave të Partisë Demokratike ku dhe ka mbetur i plagosur sekretari i kësaj partie.
Meta është pritur me duartrokitje nga qytetarët teksa ka parë vendin ku mbeti i plagosur 27-vjeçari Bledar Okshtuni. Nga pamjet duket se në shoqërinë e Presidentit Meta ishte dhe kandidatja e PD Grida Duma.
“Kam një paralajmërim për kryeministrin e bandave të Shijakut dhe të Dibrës që shkatërruan zgjedhjet e kaluara dhe që na katandisën në këtë situatë. Të jetë gjaku i fundit për zgjedhje që derdhet. Ti jo Kushtetutë që nuk njeh dhe do ta mësosh mirë se ç’është Kushtetuta dhe ligji, por ti nuk i di as rregullat e shqiptarit sepse nuk ke gjak shqiptari. Je vetëm një shqipfolës dhe një kuisling i të tjerëve për të përçarë shqiptarët me njeri-tjetrin. Shqiptarit po i hyre në shtëpi të bën atë gjë që nuk të ka shkuar në mendje ty. Ti ke çuar rrugaçët për të hyrë në shtëpinë e PD, të opozitës për t’i dhunuar, shyqyr Zotit që ka shpëtuar dhe i urojmë të shkuara, i ke lëshuar banditët tërë natën nëpër gjithë Shqipërinë, ca i nxore nga burgu me garanci që t’i përdorje për zgjedhjet. Iu ke mbushur mendjen gjoja do fitoje mandatin e tretë… Ndaj thirri mendjes, para se të jetë vonë dhe para se të merren vendime historike për të ardhmen e Shqipërisë për 100 vitet që vijnë. Lëri qytetarët të votojnë të lirë dhe të qetë. Boll e shkele Kushtetutën. Ti e dhunove marrëveshjen e 5 qershorit. Ti ke bërë me qindra krime zgjedhore gjithë këto ditë. Mos kujto ti se Kavaja dhe Shqipëria mund të dhunohet dhe poshtërohet. Je ti që i fute kriminelët në politikë masivisht deri sa u ngrit gjithë bota për një ligj dekriminalizimin. Zonja Duma ju përshëndes për fushatën tuaj të qetë dhe shumë civile dhe shumë qytetarë dhe vazhdoni në këtë mënyrë. I ftoj të gjithë qytetarët e Kavajës të ruajnë qetësinë, të kujdesemi për shëndetin e të plagosurit. Ato motivet e dobëta t’i lërë policia. Ardi Veliu lëri motivet e dobëta. Është serioze situata, nuk ka shaka. Mos i lini ata që janë në kërkim të bredhin sepse do ketë veprime spektakolare që nuk ju ka vajtur mendja. Nuk preket më vota e shqiptarëve. Ka trima që duan ta prekin, ta provojnë. Ka çuna problematikë po kur të bëhet gjithë populli problematik me presidentin problematik? Ku do shkosh ti Edi Rama. Nuk ka vrimë gjëkundi në Shqipëri që të nxë ty. Ndaj thirri mendjes. Jemi bërë faqja e zezë e botës, kemi mbetur 10 vjet mbrapa për integrimin për qejfin tënd. 3 vjet na bllokove me atë të Fierit, tani dhe 5-6 vjet me këto zgjedhje që do t’i vjedhës e t’i marrësh sipas qejfit tënd. Thellohu, reflekto dhe shko tek SPAK-u dhe rrëfehu vetë! Me qetësi. Presidenti e ka detyrë të bëjë thirrje për reflektim. Me qetësi! Çdo njeri që bën krime zgjedhore do të përgjigjet. Nuk ka asnjë rrethanë lehtësuese”, deklaroi Meta.
