Kryetari i grupit parlamentar të Partisë Socialiste, Taulant Balla ka reaguar në lidhje me vendimin e presidentit Meta për të kthyer në parlament ligjin 44/2019 që parashikon disa ndryshime në Kodin Penal.
Balla shkruan se ky vendim i Presidentit tregon se ai nuk është dakord “që në një shoqëri demokratike, dhuna të ndëshkohet e kurrsesi nuk mund të tolerohet”.
Ndryshimet e propozuara në Kodin Penal shkruan Balla adresojnë shqetësimet e qytetarëve në lidhje me sigurinë ushqimore, dhunën ndaj mjekëve, policëve, funksionarëve të shtetit dhe atë në stadiume. Gjithashtu shton ai zgjerohet fusha e mbrojtjes kundër bllokimit të akseve kombëtare, cënimi i të drejtave të autorit.
“Ilir Meta nuk qenka dakord me sigurinë ushqimore të shqiptarëve – kush shet mallra ushqimore të skaduara duhet të ndëshkohet më shumë. Presidenti në detyrë Ilir Meta u rreshtua sot në krah të dhunuesve ndaj mjekëve apo policëve të shtetit. Ilir Meta u rreshtua sot krah bllokuesve të rrugëve, teksa shqiptarët shkojnë në punë, shtëpi, spital, e kudo tjetër. Kush shkel të drejtat e autorit, duhet të ndëshkohet, por Presidenti në detyrë nuk qenka dakord” janë disa nga akuzat që nënkryetari i PS hedh ndaj Metës statusin e të cilit ai e quan president në detyrë.
Megjithatë Balla në statusin e tij, me gjithë argumentimin për të mirat që sjell ligji 44/2019, nuk i kthen përgjigje kritikave për 4 nenet që Meta i cilëson si problematike dhe të formuluara jo qartësisht sipas tij.
LEXO: Meta kthen ndryshimet në Kodin Penal, ja 4 nenet problematikë
Presidenti në argumentimin e tij arsyeton se neni 3,6,7 dhe 11 kanë mangësi në formulim dhe mund të shkaktojnë problematika juridike. Këto nene konkretisht lidhen me ndërhyrjet e padrejta në jetën private, përdorimin e shprehjeve abstrakte si “ose ka mundësi të shkaktojë” në nenet 6 dhe 7 si dhe mos përcaktimin e saktë të subjektit të veprës penale në nenin 11 për braktisjen e kafshës të shoqërimit.
Balla nuk përmend asnjë nga këto në statusin e tij përveç pikës së fundit.
“Një nen i ri në Kodin Penal rregulloi problemin e qarkullimit të kafshëve të rrezikshme zoti President, si qentë agresivë, pa maska mbrojtëse. Ku hyn siguria juridike këtu? Mosvendosja e këtyre maskave do të gjobitet deri në 1 milionë lekë gjobë. Ndërsa në rastet e dëmtimit të qytetarëve nga kafshimi, përgjigjet penalisht pronari i qenit (deri në 10 vjet burg nëse shkaktohet vdekja)” shkruan ai. Megjithatë kritika ndaj nenit 11 nuk ka të bëjë me sigurinë juridike por me mos përcaktimin e saktë të subjektit të veprës penale dhe faktin se nuk rregullon situatën ku pasoja në shëndetin e një personi, plagosja e rëndë nga kafsha mund të ndodh në banesën e pronarit të kafshës. /Opinion.al
