Presidenti, Ilir Meta, në përgjigje të sugjerimit të ambasadores së SHBA-së, Yuri Kim që t’u bëhet Vetting kandidatëve për deputet, u shpreh se vetëm zgjedhjet e lira dhe të ndershme mund të pastrojnë vendin nga politikanët e korruptuar.
“Ka ardhur koha që përmes zgjedhjeve të lira të pastrohet gjithçka e të kemi institucione plotësisht demokratike e legjitime. Vetëm zgjedhjet e lira dhe të ndershme e pastrojnë politikën nga elementë kriminalë apo të korruptuar që për interesa grupesh të ndryshme kërkojnë të mbajnë peng funksionimin e shtetit ligjor në mënyrë të plotë dhe në mënyrë europiane.”- u shpreh Meta në përgjigje të interesit të medias.
Po ashtu, kreu i shtetit u shpreh se ende nuk ks një datë për zgjedhjet e ardhshme parlamentare, pasi fillimisht po pret propozime nga krerët e partive.
” Data e re e zgjedhjeve? Do duhet të dëgjoj përfaqësuesit e forcave politike dhe më pas do flasim me siguri kam kërkuar takime me të gjithë kryetarët e partive dhe më pas do të kemi vlerësimet përfundimtare. Ka ardhur koha që përmes zgjedhjeve të lira të pastrohen në vendin tonë dhe të kemi institucione demokratike, zgjedhjet e ndershme pastrojnë politikë nga politikanët kriminal dhe të korruptuar që për interesa të ndryshme kërkojnë të mbajnë peng shtetit”, tha Meta nga konferenca shkencore për 100-vjetorin e Luftës së Vlorës.
Pyetur nga gazetarët për ngritjen e KQZ-së së re, kreu i shtetit tha se nëse ka vullnet çdo gjë është lehtësisht e zgjidhshme.
“Nëse ka vullnet të gjitha çështjet janë shumë të thjeshta, nëse ka vullnet për zgjedhje demokratike,nuk shikoj arsye që të mos zgjidhen, këto janë detaje, nëse nuk ka vullnet atëherë flasim një ditë tjetër”, përfundoi ai./Opinion.al
