Presidenti i Republikës Ilir Meta ka dekretuar pasditen e sotme Sonila Bejten si anëtare të Gjykatës Kushtetuese.
Me këtë emërim ka shkuar në shtatë numri i gjyqtarëve në Gjykatën Kushtetuese. Gjykata Kushtetuese aktualisht ka shtatë anëtarë Vitore Tusha, Elsa Toska, Marsida Xhaferllari, Fiona Papajorgji, Altin Binaj, Përparim Kalo dhe Sonila Bejtja.
Kujtojmë që pas 3 vitesh kjo gjykatë është bërë funksionale.
Deri më tani janë emëruar në total 7 anëtar, nga 9 që duhet të ketë gjithsej Gjykata Kushtetuese:
Antarët:
- Dr. Vitore Tusha, anëtare me kompetenca të Kryetarit
- Dr. Elsa Toska, anëtare
- Marsida Xhaferllari, anëtare
- Dr. Fiona Papajorgji, anëtare
- Altin Binaj, anëtar
- Përparim Kalo, anëtar
- Sonila Bejtja, anëtare
Njoftim i Institucionit të Presidentit të Republikës
Presidenti i Republikës, Sh.T.Z Ilir Meta sot më datë 28.12.2020, ka administruar nga Këshilli i Emërimeve në Drejtësi Listën Përfundimtare të Renditjes së Kandidatëve të lejuar për kandidim dhe Raportin e Arsyetuar të Renditjes së tyre për plotësimin e vendit vakant në Gjykatën Kushtetuese, vakancë e parakohshme, e krijuar pas mbarimit përpara kohe të mandatit të ish-gjyqtarit Besnik Muçi, shpallur nga Presidenti i Republikës me Dekretin nr. 11364, datë 22.11.2019.
Sipas praktikës dokumentare të dërguar, Këshilli i Emërimeve në Drejtësi me vendimin nr. 66, datë 28.12.2020, ka vendosur miratimin e listës përfundimtare të renditjes së kandidatëve për gjyqtar në Gjykatën Kushtetuese, në vendin vakant, vakancë e parakohshme, e shpallur nga Presidenti i Republikës në datën 22.11.2019, si më poshtë:
1) Sonila Bejtja 76.83 Pikë
Presidenti Meta, pasi u njoh dhe vlerësoi praktikën dokumentare të vendimmarrjes së Këshillit të Emërimeve në Drejtësi; si dhe duke vlerësuar njëkohësisht nevojën jetike që ka vendi për plotësimin dhe funksionimin sa më parë, e mbi të gjitha në mënyrë të qëndrueshme të Gjykatës Kushtetuese, në përfundim të shqyrtimit, në mbështetje të neneve 93, 125 pika 1, 127 pika 3, 129, 149/d pika 1, të Kushtetutës së Republikës së Shqipërisë, neneve 7, 7/a pika 4, 7/b, 7/dh pika 2, të ligjit nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, të ndryshuar, pa asnjë vonesë, me Dekretin nr. 11886, datë 28.12.2020, ka vendosur që:
– Zonja Sonila Bejtja të emërohet gjyqtar në Gjykatën Kushtetuese./Opinion.al
