Me përjashtimin e Donald Trumpit nga funerali i tij, John McCain i dërgoi një mesazh të fundit kuptimplotë presidentit amerikan. Ditët e vajtimit të senatorit të Arizonës, përfshirë homazhet në Capitol dhe shërbesën në Katedralen kombëtare të Uashingtonit, do të jenë diçka më shumë sesa thjesht nderim i një udhëheqësi politik dhe një heroi kombëtar.
Në Uashington, shkruan CNN, edhe vdekja është politike. Këtë McCain e kishte kuptuar mirë dhe e tregoi me planifikimin e ceremonisë së tij mortore, duke përjashtuar prej saj shefin e administratës.
Deklarata e tij “postmortum” drejtuar Shtëpisë së Bardhë është e patjetërsueshme. Vlerësimet vërshojnë nga njëra anë për McCainin, kurajon, nderin, dinjitetin dhe karakterin e tij, ndërkohë që nga ana tjetër, Trumpi përballet me debate të ashpra publike të lidhura si me personalitetin, ashtu edhe me sjelljen e presidentit amerikan.
Vetëdeklarimi i ish-avokatit të tij personal, Michael Cohen, për shkelje të rregullave të fushatës dhe dënimi i ish-menaxherit të saj, Paul Manafort, javën e kaluar ishin një goditje e fortë që e nxiti edhe më shumë stuhinë politike e atë ligjore të përplasur mbi Shtëpinë e Bardhë.
Megjithatë, ato përsëri nuk i shtynë dot udhëheqësit republikanë që ta kritikonin Trumpin. Ndërsa McCain po e bën këtë, edhe pse nuk flet dot më.
Për këtë arsye, ceremonitë e planifikuara në nder të tij, me shumë gjasë do të shndërrohen në debate mbi moralin politik, sjelljen dhe parimet e pritura nga figurat publike, në një erë tejet të polarizuar politike, e cila është trazuar edhe më shumë nga ndikimi turbullues i Trumpit.
Përçarja mes presidentit amerikan Donald Trump dhe John McCain mbeti e dukshme edhe gjatë së dielës, teksa homazhe për ish-senatorin e ndjerë vërshuan lumë nga udhëheqës botërorë dhe ish-presidentë amerikanë.
Shtëpia e Bardhë nuk publikoi asnjë deklaratë, ndërkohë që Trumpi e pasoi ngushëllimin e shkurtër në “Twitter” për familjen e McCainit, i nisur mes nxitimit të parë të homazheve të së shtunës, me ankesat e zakonshme mbi hetimin ndaj Rusisë dhe mburrjeve për ekonominë. Më pas vijoi me kursin e golfit…
Dëshira e McCainit, që Trumpit të mos i jepej një ftesë për pjesëmarrje në funeralin e tij e që u bë publik disa muaj më parë, mbeti e pandryshuar derisa tumori në tru i mori jetën ditën e shtunë, në shtëpinë e tij në Arizona ku ishte i rrethuar nga familja.
Ndërkohë, George W. Bushit, i cili e mposhti McCainin për nominimin republikan në vitin 2000; si dhe Barack Obamës, i cili e mposhti bindshëm për Shtëpinë e Bardhë në vitin 2008, iu është kërkuar të mbajnë fjalime gjatë ceremonisë mortore, që do të zhvillohet në Akademinë Detare të Shteteve të Bashkuara, në Maryland.
Në një deklaratë të së shtunës, Obama përshëndeti “besnikërinë e McCainit ndaj diçkaje më të lartë, idealeve për të cilat breza të tërë amerikanësh dhe emigrantësh kanë luftuar, marshuar dhe sakrifikuar”.
Bush lavdëroi një “njeri me bindje të thella” dhe një “shërbyes të publikut sipas traditave më të shkëlqyera të vendit tonë”.
Në një dalje emocionale në shfaqjet televizive të së dielës, Jeff Flake, një tjetër senator nga Arizona dhe kritik i Trumpit, bëri thirrje që trashëgimia e McCainit për “vendosjen e interesave të vendit mbi ato personale” të jetojë gjatë në një Kongres thellësisht të përçarë, në një kohë që është “më shumë se kurrë e rëndësishme”.
Flake, i cili do të tërhiqet nga Senati këtë vit dhe që shihet gjerësisht si një kandidaturë e mundshme për të sfiduar Trumpin brenda Partisë Republikane në zgjedhjet e vitit 2020, ishte i kujdesshëm në përgjigjet e dhëna ndaj pyetjeve mbi presidentin.
Grindja mes McCainit dhe Trumpit ishte tejet e ashpër. Senatori luftoi në Vietnam si pilot i marinës dhe në vitin 1967 u plagos rëndë pasi i rrëzuan avionin. Ai kaloi më shumë se 5 vite si i burgosur lufte në Hanoi, ku u torturua dhe dhunua. Ai refuzoi të lirohej para kohe, në shenjë solidariteti me kolegët e tij dhe për çështje nderi.
Trump, i cili kishte kërkuar 5 herë shtyrje të shërbimit në Vietnam, teksa në një prej rasteve kishte cituar “një gungë” në këmbën e tij, e sulmoi ashpër McCainin gjatë zgjedhjeve të vitit 2016, kur tha gjatë një konference në Iowa se “ai nuk ishte hero i luftës, por u bë hero sepse u kap rob. Ndërsa unë pëlqej njerëzit që nuk kapen rob”.
“Washington Post” raportoi të premten se Trump u ka thënë ndihmësve të tij se nuk tërhiqet nga komentet e tij të së kaluarës.
