Një ditë pas shpërthimit në makinën e Gerti Aleksit, n/drejtor i ALUIZNI-t për Durrësin mësohet se autorët nuk kanë patur qëllim ta vrasin por vetëm ti çojnë një sinjal Aleksit. 20 persona janë shoqëruar në polici, pasi mendohet se kanë dijeni për ngjarjen. Ndërsa autorët e dyshuar ende nuk janë zbuluar nga policia. Vetë Gerti Aleksi gjatë marrjes në pyetje ka deklaruar se nuk ka konflikte personale, duke lënë të kuptuar se atentati mund ti jetë bërë për shkak të detyrës. Gerti Aleksi njihet në Durrës si njeri i afërt (lidhje gjaku) me kryetarin e Bashkisë së Durrësit Vangjush Dako.
Ngjarja ndodhi mbrëmjen e së hënës në sheshin “Taulantia” të qytetit bregdetar dhe nuk pati të lënduar. Fuoristrada “Land Rover” me targa AA 780 OL ku udhëtonte n/drejtori është përfshirë nga flakët. Makina ishte në pronësi të shtetasit A.S, por përdorej nga nëndrejtori i ALUIZNI-t, Gerti Aleksi.
“Nisur nga sasia e vogël e lëndës plasëse të vendosur në mjet dhe dëmeve të shkaktuara, dyshohet se bëhet fjalë për një paralajmërim për pronarin e makinës”, thonë burimet nga policia e Durrësit. /Opinion.al
