Rëndohet pozita e mësuesit të akuzuar dhe arerstuar për pedofili dhe kryerjen e veprave të turpshme me fëmijët në shkollë. Pas denoncimit të nënës së një 11 vjecareje, Neshat Tepelena nga fshati Kalasë i Delvinës është vënë në pranga, ndërsa ka mohuar akuzat. Por sot një tjetër prind ka dëshmuar publikisht kundër mësuesit.
Babai i shoqes së klasës së vajzës së abuzuar, ka thënë për Ora News, se Neshat Tepelena e ka telefonuar dhe i ka kërkuar që vajza e tij të mos flasë rreth asaj që ka parë në shkollë.
Viktor Ajdini u shpreh se “disa ditë pas publikimit të ngjarjes, mësuesi Neshat Tepelena më ka telefonuar mbi 10 herë dhe më ka thene: Thuaj vajzës të thotë që nuk ka parë gjë në shkollë!”
Kjo dëshmi pritet të merret edhe nga grupi hetimor. Mësuesi, 60 vjecar Neshat Tepelena ka deklaruar se të gjitha janë spekulime dhe se ai do të dalë i pafajshëm, por përtej pretendimit të tij, gjykata e Sarandës vendosi ta lërë dje në masën e sigurisë “arrest me burg”. Sakaq, hetimet dhe gjykimi i mëtejshëm do të vijojë në gjykatën e Gjirokastës, pasi ajo e Sarandës nuk ka sektor që merret me të miturit dhe ngacimet seksuale ndaj tyre.
Ngjarja mendohet se ka ndodhur 2 muaj më parë, por denoncimi ndaj tij u bë një javë më parë, për shkak të turpit që ndjente familja e vajzës së abuzuar dhe frikës së paragjykimit në fshat. Nëna e 11 vjeçares e divorcuar nga bashkëshorti e kishte lënë vajzës ta rrisnin gjyshërit në fshatin Kalasë të Delvinës. Ata i kishin thënë se vajza nuk pranonte të shkonte të shkollë, pasi mësuesi duke i bërë presion për notat e kishte puthur në buzë. Më tej, ajo ka vendosur dhe ka bërë kallëzimin në polici, që çoi në arrestimin e mësuesit.
Sipas banorëve të fshatit Kalasë, mësuesi ka qenë i përfshirë në ngjarje të tilla edhe më herët, në një rast madje çështja shkoi deri në Drejtorinë e Arsimit, por kaloi vetëm me vërejtje.
/Opinion.al
