Ora 13:00 – Nga selia e Partisë Demokratike, nënkryetari Edi Paloka njoftoi mbylljen e protestës së sotme që u drejtua kryesisht nga studentët. Ajo zgjati rreth tre orë, ndërsa Lulzim Basha nuk ishte i pranishëm për shkak të takimeve në Gjermani.
“Dua t’ju përshëndes për forcën dhe kurajën, edhe në emrin e Lulzim Bashës. Sot protestën tonë e drejtuan jo më kot studentët, ata ishin në ballë, ishin zemra e protestës, sepse Shqipëria që ne duam është Shqipëria e studentëve në radhë të parë, ta ndërtojmë për fëmijët tanë këtu ku jetojmë”, u shpreh ai.
Paloka tha se vala e protestave nuk do të ndalojë deri në rrëzimin e qeverisë së drejtuar nga Edi Rama.
“Do të jemi në protestë deri sa ai të shporret, të jeni të sigurt që dita kur të largohet është e afërt. Atë cinik që merr administratën si cirk shëtitës, nga Librazhdi në Vlorë për t’u tallur, do ta shihni si do të marrë vrapin”, tha Paloka.
Në fund, nënkryetari demokrat pati edhe një mesazh për deputetët e opozitës që kanë zëvë vendet në Parlament, duke i quajtur “surrogat” dhe “bashibozukë”.
“Mund të mbledhë surrogat në Parlament, mund t’i vërë emrin deputetë, mund të bëjë edhe palaçollëqe, ajo është vetëm skena e shfaqjes së fundit të bashkëpunimit të krimit dhe bashibozukë që hiqen si deputetë të opozitës”, ka thënë Edi Paloka nga selia e Partisë Demokratike.
Ora 12:20-Opozita e zhvendos protestën nga Parlamenti te Kryeministria. Bashkë me protestuesit, drejt Kryeministrisë janë zhvendosur edhe forcat e shumta të policisë që ishin të vendosur te Parlamenti. Ndërkohë, disa deputetë dolën jashtë salle pas largimit të protestuesve.
Ora 12:00- Protestuesit i vënë flakën “piramides së Rilindjes, sic e cilëson opozita, në krye të së cilës qëndron Edi Rama.
Ora 11:45- Sherr në mesin e protestuesve, konfliktohen fizikisht disa persona. Nga ana tjetër, me megafon policia bën thirrje: “mos dhunoni efektivët”. Dyshohet se protestuesit janë përplasur fizikisht me një polic të infiltruar.
Ora 11:30-Apeli i Policisë së Shtetit: Ruani gjakftohtësinë. Ruani qetësinë. Mos hidhni kapsolla në drejtim te punonjësve të policisë. Mos u përplasni me punonjësit e policisë. Të nderuar organizatorë të protestës. Merrni masa të menjëhershme që protestuesit që kane mbuluar fytyrën me shall e maska ose te zbulojnë fytyrën ose t’i largoni menjëherë nga protesta. Sipas ligjit për tubimet mbulimi i fytyrës dënohet deri në 6 muaj burg. Ju si organizatore te tubimit mbani përgjegjësi ligjore për mbarëvajtjen e tubimit
Ora 11:15- Tensionohet situata përpara Kuvendit. Disa protestues kanë tentuar të çajnë kordonin e parë të policisë.
Ora 9:40- Grumbullimi i protestuesve të opozitës përpara Kuvendit të Shqipërisë ka shënuar incidentin e parë të ditës së sotme, teksa dhjetëra prej tyre janë përplasur me forcat policore te Pedonalja. Nga vendngjarja raportohet se policia ka krijuar një kordon për të mos lejuar hyrjen e protestuesve në zonën përreth Parlamentit, ku pak më vonë do të mbahet edhe seanca plenare. Ndërkohë, në Kuvend pritet të betohen edhe 3 deputetë të rinj nga radhët e opozitës.
https://www.facebook.com/partiademokratike/videos/368425863766075/
***Opozita proteston sot përpara Parlamentit, në kohën kur do të zhvillohet edhe seanca plenare. Bëhet me dije se Lulzim Basha do të mungojë për shkak të angazhimeve jashtë vendit. Ai është nisur ditën e djeshme për në Gjermani, ku në axhendë ka takime me përfaqësues të CDU-së për t’i njohur me situatën politike në Shqipëri.
Kjo e sotmja është protesta e tetë në numër. Dy të tilla janë zhvilluar përpara Kryeministrisë ndërsa pesë përpara Kuvendit. Opozita ka paralajmëruar protesta sa herë të ketë seancë plenare për të kërkuar dorëheqjen e kryeministrit Edi Rama dhe një qeveri tranzitore që do të përgatisë vendin për zgjedhje të parakohshme të lira dhe të ndershme që do t’i hapnin rrugën Shqipërisë drejt integrimit./Opinion.al
