Avokatët e dy ish-drejtorëve të rrugëve Dashamir Xhika dhe Andi Toma, të cilët u arrestuan disa ditë më parë, kanë kontestuar faktin që vendimi i gjykatës për miratimin e masës së sigurimit të propozuar nga prokuroria ishte copy paste me kërkesën e Prokurorisë.
Kjo është konsideruar një shkelje ligjore, ndërsa u pranua nga prokurorja që ishte komunikuar me email.
Avokatët kanë kontestuar mënyrën e kontrollit të banesës, jashtë orarëve ligjore dhe duke ushtruar terror në familjet e të akuzuarve.
Gjithashtu, ata kontestuan faktin që gjykata kishte pranuar pretendimin e prokurisë se vlera e dëmit nga kontrata ishte sa gjithë vlera e kontratës, ndërkohë që rruga është përfunduar në 90 përqind të saj.
Sipas tyre, Prokuroria pretendon se është shkaktuar dëm ekonomik ndërkohë që kontrata nuk ka përfunduar dhe garancia e punimeve në zotërim nga ARRSH është më e madhe se dëmi i pretenduar nga Prokuroria.
Në lidhje me tërheqjen e gjyqtarës, avokatët theksojnë se ajo ka shkelur precedurat ligjore, si dhe ka pranuar kërkesat absurde të Prokurorisë pa vlerësuar provat (nuk kishte asnjë provë në vendimin e Gjykatës për pranimin e masës së sigurimit të kërkuar nga Prokuroria) dhe ishte e paragjykuar për çështjen.
Ata bëjnë me dije se u kontestua fakti që ka kaq vite, mbi dy vjet, që hetohet çështja dhe të akuzuarit janë paraqitur rregullisht dhe pse pikërisht tani u futen në burg? Më tej, u kontestua edhe masa e sigurisë me burg, pasi ata nuk paraqësin rrezikshmëri shoqërore.
Ka nisur prej orës 11 në Elbasan masa e sigurisë për dy ish-drejtorët e rrugëve Dashamir Xhika dhe Andi Toma. Seanca është ndërprerë pas kërkesës për përjashtimin e gjyqtares. Në sallë ka pasur tensione herë pas here mes avokatëve dhe gjyqtares.
Ndërkohë kërkesën për përjashtim të gjyqtares do ta shqyrtojë Bujar Musta.
Prokuroria dyshon se dy ish-zyrtarët kanë shpërdoruar detyrën gjatë tenderimit të rrugës Elbasan-Gjinar dhe rehabilitimit të këtij aksi rrugor.
Andi Toma ishte drejtor i Përgjithshëm i ARRSH nga 2008-2013 dhe u pasua nga Dashamir Xhika i cili drejtoi autoritetin rrugor deri në vitin 2017.
Seancën prej fillimit e ka ndjekur edhe ish-ministri Edmond Haxhinasto.
