Ministri për Diasporën, Pandeli Majko tha sot në Kuvend se mungesa e opozitës në zgjedhje do ta degradojë vendin në regjim. Sipas Majkos PD nuk ka ndjekur një politikë opozitare konstruktive, përkundrazi ajo ka zgjedhur bojkotin dhe parimin ‘o të gjitha ose asgjë’. Kjo ka sjellë edhe krijimin e kësaj klime politike që ka çuar vendin në krizë.
Përsa i përket vendimit të presidentit Meta për të anuluar datën e zgjedhjeve, Majko e ka vlerësuar si të gabuar por në të njejtën kohë ka rikujtuar se presidenti është produkt i PS sepse shumica e tyre e votoi.
Për Pandeli Majkon negociatat për zgjidhjen e krizës zgjidhen me trupat parlamentare brenda Kuvendit kështu që edhe në rastin aktual deputetët që kanë hyrë nga listat e PD dhe LSI duhet të konsiderohen si opozita me të cilën duhet negociuar.
“Shqipëria rrezon të bjerë në informalitet legal në mungesë të zgjedhjeve, teknikisht zgjedhjet pa opozitën nuk mund të konsiderohen normale dhe ne rrezikojmë degradim në regjim. Kjo situatë nuk është produkt, por pasojë e vendimeve të opozitës jashtë Kuvendit. Ajo e vlerësoi bojkotin si mekanizëm për të shkuar në zgjedhjet e përgjithshëm të parakohshme. Kriza aktuale është pasojë e një politike opozitare që vepron sipas parimit të gjitha ose asgjë. Ky është gabimi i rëndë.
Partia Socialiste duhet të negociojë krizën edhe me trupën parlamentare që ka hyrë në Kuvend nga listat zëvendësuese të opozitës, çdo vendim duhet të kalojë nga votimi në Kuvendin e Shqipërisë. Sot politika në mungesë të Gjykatës Kushtetues nuk ka mundësi legale të negociojë afatet e Kushtetutës së republikës së Shqipërisë për zgjedhjet, por ky Kuvend ka të drejtë të ndryshojë Kushtetutën bazuar mbi këtë eksperiment negative që po ndodh. Grupi i opozitës në Kuvend duhet respektuar për propozimet për ndryshimin e sistemit elektoral, pavarësisht se me deputetë të rinj, ata kanë të drejtë t’i japin historisë së këtij Kuvendi, vendimin dhe vlerësimin publik për to. Dekreti i Presidentit duhet regjistruar si një akt jo kushtetutës dhe jam dakord me propozimin e këtij qëllimi.
Presidenti ka gabuar dhe ka krijuar një problem. Ilir Meta është zgjedhur President nga Partia Socialiste, ai është produkti ynë.”, theksoi Majko.
