Bota

Lufta në Ukrainë, Suedia distancohet nga NATO përballë presionit të Rusisë


Bëhu pjesë e Grupit Zyrtar të Opinion.al
>> KËTU <<
               Publikuar në : 20:30 - 08/03/22 |
el ida

Një kërkesë e Suedisë për t’u bashkuar me NATO-n do të destabilizonte situatën aktuale të sigurisë në Evropë, tha të martën kryeministrja Magdalena Anderson.

“Nëse Suedia zgjidhte të dërgonte një kërkesë për t’u bashkuar me NATO-n në rrethanat aktuale, kjo do të destabilizonte më tej këtë rajon të Evropës dhe do të rriste tensionet,” u tha kryeministrja suedeze gazetarëve. Anderson tha se ishte më mirë që Suedia dhe siguria e rajonit të kishin një politikë të jashtme të qëndrueshme dhe transparente.

Stokholmi, shtoi ajo, po shqyrton mënyrat për të mbështetur Ukrainën në përpjekjet e saj për të zmbrapsur sulmet kibernetike.

Vihet re se si Suedia ashtu edhe Finlanda kanë njoftuar se po forcojnë më tej bashkëpunimin e tyre të mbrojtjes në dritën e përkeqësimit të mjedisit të sigurisë në Evropë për shkak të luftës së Vladimir Putin në Ukrainë, citon Cnn grek.

“Lufta e Rusisë kundër një shteti sovran evropian e vë në rrezik rendin e sigurisë evropiane. Në këtë mjedis në ndryshim, Finlanda dhe Suedia do të forcojnë më tej bashkëpunimin e tyre”, tha kryeministrja finlandeze Sana Marin në një konferencë për shtyp që dha disa ditë më parë në Helsinki me homologen e saj suedeze Magdalena Anderson.

Suedia dhe Finlanda ruajnë lidhje historike dhe bashkëpunim të ngushtë ushtarak, duke përfshirë stërvitje të përbashkëta dhe shkëmbim informacioni. Të dy vendet marrin sistematikisht kërcënime nga Rusia përballë kthesës së tyre të mundshme drejt anëtarësimit në NATO.

Takimi në Helsinki u zhvillua të shtunën, në mes të luftës në Ukrainë dhe nën hijen e provokimit rus kundër Suedisë me shkeljen e hapësirës ajrore të saj nga katër avionë luftarakë në lindje të ishullit Gotland javën e kaluar. Pas përfundimit të Luftës së Ftohtë, Suedia kishte reduktuar shpenzimet e saj ushtarake, por forcoi aftësitë e saj mbrojtëse pas vitit 2014, kur Rusia aneksoi Krimenë.

Suedia, e cila nuk është përfshirë në asnjë luftë për dy shekuj, rifilloi shërbimin e detyrueshëm ushtarak në vitin 2017 dhe rihapi një kamp në ishullin Gotland në janar 2018. Sot, pas pushtimit rus të Ukrainës, Suedia po merr pjesë në sanksionet ndërkombëtare kundër Rusisë dhe kryeministrja e vendit, Magdalena Anderson, njofton forcimin e aftësive ushtarake të vendit dhe përshpejtimin e riarmatimit të tij tashmë në vazhdim.

Të shtunën, më 26 shkurt, Presidenti i Finlandës, Sauli Niinisto, njoftoi zgjerimin e bashkëpunimit ndërmjet Helsinkit dhe Stokholmit me NATO-n, pas një takimi të jashtëzakonshëm të Aleancës. Bashkëpunimi i zgjeruar “përkthehet” në shkëmbim informacioni dhe komunikimi në një nivel strategjik nëse dhe kur shihet e nevojshme.

Finlanda dhe Suedia morën pjesë në samitin e jashtëzakonshëm të NATO-s përmes telekonferencës, gjatë së cilës u vendos për të forcuar forcat aleate në Evropën Lindore.

Ndërsa samiti përparonte, Moska përsëri kërcënoi Finlandën dhe Suedinë me “masa politike dhe ushtarake” në rast të një lëvizjeje për t’u bashkuar me NATO-n./Opinion.al

 

Pas