Pas tejkalimit të provës së propozimit të ministrave të rinj, të cilët përfaqësojnë Partinë Demokratike, Lulzim Basha shumë shpejt u përball me një tjetër sfidë: Shpalljen e listës së kandidatëve për deputet. Zyrtarizimi i listave konsiderohet si një nga momentet më delikate për krerët e dy partive të mëdha, pasi ky proces krijon natyrshëm hatërmbetje, turbullira, rebelime dhe përçarje në parti.
Për shumëkënd, lista e emrave me të cilët Partia Demokratike do të konkurrojë në zgjedhjet e 25 qershorit, është parë si një surprizë. Për ata që mbetën jashtë saj por dhe emrat e rinj të përfshirë në të.
Dy deputetet e Shkodrës dhe Korçës, Irma Kopliku e Eleina Qirici, kanë dhënë mbështetje maksimale për kryetarin Lulzim Basha dhe PD-në, pavarëissht se ky i fundit nuk i përfshiu në listë.
Qirici është më e drejtpërdrejt me mesazhin e saj: “Bashkohuni me Lulzim Bashën. Fitore PD”.
Ndërkohë, Kopliku ka rikujtuar të gjitha përballjet në katër vite në Kuvend dhe fton qytetarët të japin mbështetje për PD: “Më së fundmi ekipi për 25 qershorin, për përballjen përfundimtare është gati.
Mjaft nga figurat me një jetë të gjatë politike në këtë parti e që në të kaluarën kanë mbuluar funksione të rëndësishme partiake dhe zyrtare, nuk ishin pjesë e saj. Po ashtu jashtë mbetën dhe emra të rëndësishëm të cilët ishin shfaqur kritik me mënyrën se si zoti Basha ka drejtuar partinë këto katër vite si dhe nuk ishin pajtuar me zgjedhjen e tij për të mos marrë pjesë në garën elektorale, kur nisi protestën për të kërkuar një qeveri teknike, apo dhe këmbënguljen deri në momentet e fundit për të refuzuar propozimet e komunitetit ndërkombëtar.
Në një postim në Facebook, zonja Bregu shkruan se sipas saj në listat e PD janë ata “që nuk lanë gjë pa bërë e thëne, sepse e deshën PD-në jashtë zgjedhjeve. Ata që s’thanë asnjë fjalë ose më saktë thanë bëma e bënë gjëma, për të justifikuar absurdin se PD jashtë zgjedhjeve kishte nisur ndërtimin e kantierit të Republikës së Re!! Ata që mbrëmë i ka zënë gjumi pa asnjë lidhje me PD e që në mëngjes janë zgjuar të renditur në vijën e parë të saj. Brenda janë ata që e donin PD jashtë!”, shkruan zonja Bregu.
Thuajse në të njejtën linjë edhe deputeti Patozi, sipas të cilit çadra e protestës “u ngrit për të shpëtuar lëkurën e Lulzim Bashës”. Deputeti demokrat shkruan madje se “ëndrrat e Republikës së Re me ato te “Rilindjes” ngjajnë. Madje, ka raste që ato janë e njejta gjë”, ndërsa shton se “nuk mund të ketë as shtet dhe as Shqipëri më të mirë, nëse partitë do të bunkerizohen dhe do të kthehen në kompani biznesesh të pista me një pronar të vetëm”.
Për drejtuesin e sektorit të organizimit në PD më pas zëvendës ministër i Brendshëm dhe Sekretar i Përgjithshëm i Kryeministrisë, sot Gjergj Lezhja është këshilltar i Presidentit për Sigurinë, por me sa duket, tek lista e përpiluar nga kreu i demokratëve nuk ka parë fitoren.
Lezhja shkruan se nuk është aspak i çuditur nga lista e deputetëve të Partisë Demokratike, ndonëse sëpata e spastrimeve është e pa precedentë në politikën shqiptare. Sipas tij, as Edi Rama nuk ka bërë një spastrim të tillë me një të rënë të lapsit, por ka respektuar në vite ish funksionarët e vjetër të PS. Ai thekson se Basha nuk është ideatori i vetëm i kësaj kasaphane, por është një filozofi dhe frymë e ndërtuar që pas humbjes në 2013.
Por një kurs disi ndryshe, ka mbajtur ish-ministri i Jashtëm Besnik Mustafaj, ku me anë të një postimi në rrjetin social Facebook; shkruan: “Po shoh më në fund listën e Bashës për zgjedhjet e ardhshme. Mua më duket me mungesa të mëdha, të papërligjura. Daltë e hajrit!”
Lista, e cila përmban shumë emra të rinj, duket se shënon një përpjekje të zotit Basha për t’i vënë vulën e tij Partisë demokratike. Megjithatë lëvizja e tij përmban jo pak rrisqe. Gjithçka duket se do të varet nga rezultati që PD do të marrë në zgjedhjet e 25 qershorit, edhe sepse në korrik zoti Basha do të duhet të futet dhe në garën për kryetarin e Partisë pas skadimit të mandatit./Opinion.al
