Misioni i KFOR-it në Kosovë ka lajmëruar se trupat e tyre do të lëvizin në pjesë të ndryshme të Kosovës. Sipas tyre kjo është pjesë e rutinës së tyre stërvitore në shenjë gatishmërie për garantimin e sigurisë.
“KFOR-i vazhdon të stërvitet për të qenë i gatshëm dhe të garantojë siguri për të gjithë njerëzit në Kosovë. Në ditët e ardhshme do të ketë disa lëvizje të trupave të KFOR-it në pjesë të ndryshme të Kosovës. Kjo është vetëm një stërvitje normale e zbarkimit dhe procedurave. Situata mbetet nën kontroll, pa asnjë shenjë kërcënimi të mundshëm”, thuhet në njoftimin e KFOR-it.
Mediat në Serbi nuk e kanë pëlqyer këtë lajm madje disa prej tyre kanë reaguar duke e paraqitur situatën alarmante ku janë përmendur gjithashtu edhe zgjedhjet e parakohshme.
Në fakt ky është një rast i përsëritur pasi Serbia sa herë që trupat e KFOR-it ose të FKS-së zhvillojnë stërvitje në terren, përpiqet ta paraqesë situatën si alarmante.
Pak kohë më parë edhe lëvizja e forcave policore në veri të Kosovës për kryerjen e një operacioni anti-kontrabandë, shkaktoi reagim të fortë nga ana e Beogradit. /Opinion.al
