Edi Rama ka zgjedhur njeriun që përflitet se po lufton më fort Saimir Tahirin brenda PS, për të dhënë sinjalin e parë se nuk ka aspak ndërmend t’a lëshojë lehtë ish-ministrin e “Policisë që duam”. Me sa duket, Rama, dha sinjalin e parë të kthimit të ‘buzëqeshjes‘ së ish-ministrit Tahiri. Krejt ndryshe nga sa ai u paraqit mbrëmjen e djeshme në emisionin Opinion në TV Klan, ku dukej në një gjendje të rënduar psikologjike.
Një orë para se të mblidhet Komisioni Parlamentar i Mandateve për heqjen e imunitetit të deputetit Saimir Tahiri, ministri pasues i Tahirit, z.Xhafaj, deklaroi se nuk shikonte prova fajësie për Saimir Tahirin.
Më pas ai ka sulmuar prokurorët që kanë hetuar dhe nënshkruar kërkesën për arrestimin e Tahirit. “Po vetëpërdoren politikisht”,-ka deklaruar ministri aktual i Brendshëm.
Pas kësaj, është përgjigjur menjëherë Prokurori i Përgjithshëm, Adriatik Llalla. Ai ka thënë me ‘keqardhje’ se zoti Xhjafaj ka kryetar komisionin e Vettingut dhe megjithatë nuk di procedurat e reja ligjore të ndryshuara sipas reformës. “Situata e tensionuar, krimi në gjithë territorin e vendit dhe veçoj Vlorën, Lushnjën, Elbasanin”- ka thënë Llalla. Detyra jonë është që të vihen para përgjegjësisë autorët” ka thënë.
Qëndrimi i zotit Xhafaj është një sinjal i rëndë se Socialistët do të vazhdojnë ta mbrojnë Saimir Tahirit edhe para krimit të kryer. Xhafaj është ministër socialist që ka manifestuar largësi e indiferencë me Tahirin, gjë që e ka pranuar edhe vetë ministri që po arrestohet.
Por me sa duket Qeveria Socialiste ka lëshuar një direktivë për mbrojtjen e Tahirit.
Një fakt i tillë, u vu re mjaft mirë në mbledhjen e Këshillit të Mandateve dhe Rregulloreve, mbledhur paradite, në lidhje me kërkesën e Prokurorisë së Krimeve të Rënda për heqjen e imunitetit të Saimir Tahirit dhe dhënien e autorizimit për arrestimin e tij.
Vetë ish-ministri i Brendshëm është i pranishëm në këtë mbledhje dhe duket mjaft i qetë, madje ndryshe nga sa u paraqit dje në emisionin “Opinion”, ku dukej në një gjendje të rëndë psikologjike, sot, shfaqet krejt ndryshe dhe mjaft i sigurtë. Do jetë avokati i tij Artan Hadaraj që do të flasë për të.
Ndërsa organi i akuzës është përfaqësuar nga kreu i Prokurorisë së Krimeve të Rënda, Besnik Hajdarmataj. Prokurori kërkoi që mbledhja të zhvillohej me dyer të mbyllura, për shkak të sekretit hetimor, por kjo kërkesë nuk u pranua nga Këshilli dhe mbledhja vijoi me dyer të hapura.
Teksa Hajdarmataj argumentoi kërkesën e tij se bëhet fjalë për heqjen e imunitetit të deputetit, teksa një pjesë të dokumenteve nuk pranoi t’i bëjë publike për median.
“Kemi bërë verifikime dhe jemi të bindur se ato biseda përputhen. Tahiri, gjatë vitit 2013, duke pasur në pronësi një automjet të tij, e kishte shitur te njëri prej vëllezërve Habilaj. Na ka rezultuar më pas se ky automjet është përdorur sërish nga Tahiri. Ne kemi ardhur për të kërkuar thjesht heqjen e imunitetit që në çdo moment të jetë i ekspozuar ndaj një mase sigurie të mundshme. Saimir Tahiri akuzohet për trafikim të lëndëve narkotike i kryer në kuadër të grupit të strukturuar kriminal dhe korrupsion pasiv i funksionarëve të lartë të shtetit”, tha Hajdarmataj.
Deputetja e Partisë Socialiste, Vasilika Hysi i ka kërkuar prokurorit Hajdarmataj, të paraqesë provat konkrete që implikojnë ish-ministrin e Brendshëm, Saimir Tahiri. Nga ana tjetër, prokurori nuk ka lëshuar një provë konkrete, duke preferuar të “rrëshkasë”.
Vasilika Hysi: Çfarë kërkoni të gjeni në banesë?
Prokurori Hajdarmataj: Profesionalisht nuk mund t’i përgjigjesha kësaj pyetje.
Prokurori Hajdarmataj: Kemi punonjës policie në përgjim që nuk mund ti themi këtu.
Hysi: Jo, nuk më interesojnë policët, për zotin Tahiri ku i keni provat.
Prokurori Hajdarmataj: Provat që mund të diskutohen janë ato që parashtruam më sipër, të tjerat nuk i themi dot këtu.
