Manjola Bregasi –
Saimir Tahiri gjeti sot mbështetjen e socialistëve në mbledhjen e Komisionit të Mandateve. Deputeti Ulsi Manja ka qenë oponenti më i fortë i grupit të prokurorëve, ndërsa u ka drejtuar atyre pyetje lidhur me formulimin e akuzës dhe ngritjen e saj, mbështetur fort edhe nga deputetja Vasilika Hysi.
Në një sagë, drejtimi i së cilës u duk se do të ndryshonte në fakt që në mëngjesin e sotëm, pyetja që ngrihet logjikisht është e thjeshtë: Përse socialistët vendosën ta mbrojnë Tahirin? Çfarë ndodhi pas mesnatës së mbrëmshme? Cilat qenë direktivat që Rama dha sot në mëngjes? (Le te mos harrojmë, se Kryeministri takoi para mbledhjes të gjithë anëtarët e Këshillit si dhe ministrin e Brendshëm Xhafa.)
Saimir Tahiri u braktis nga socialistët, veçanërisht pasi Prokuroria dërgoi në Kuvend kërkesën për heqjen e imunitetit dhe arrestimit të tij.
Askush nga socialistët nuk reagoi, askush nuk e takoi. Madje as anëtarët e Komisionit të Mandateve nuk e thirrën për ta dëgjuar, ndonëse e kishin “detryim” që të paktën të dinin se si ta mbronin.
I pyetur nga gazetari Blendi Fevziu, në emisionin e mbrëmshëm, se si ishte e mundur që as anëtarët e komisionit nuk e kishin dëgjuar, Tahiri u përgjigj: “Nuk e di, edhe unë vetë jam i çuditur”.
Por, deputeti vazhdoi duke thënë se atij nuk i duhej mbështetje dhe as do ta kërkonte një gjë të tillë. Kjo la të kuptohej se Tahiri nuk kishte në fakt mbështetjen e partisë.
Por mëngjesin e sotëm, kursi i lëvizjeve ndryshoi. Fillimisht Fatmir Xhafa, në një deklaratë që në fakt ishte përtej kompetencave të tij, pohoi se është ndërhyrë në hetimet kundër Tahirit.
Më tej, në mbledhjen e Komisionit të Mandateve, socialistët dukeshin të qartë, të vendosur dhe të fortë për ta mbrojtur deri në fund ish-ministrin e tyre, duke e vënë prokurorinë përballë pyetjeve që synonin qartazi të nxirrnin se kërkesa e kësaj të fundit për arrestimin e deputetit, ishte e pavend.
Çfarë ndodhi mbrëmë pas emisionit Opinion? Çfarë ngjarjesh të reja u zhvilluan pas mesnate? Si ishte e mundur që Tahirin, të cilin socialistët nuk e ftuan as për një kafe, sot vendosën ta mbrojnë?
Mos ndoshta mbrojtja që ai i bëri vetes në “Opinion” foli më shumë nga sa ata prisnin?
