Mesditën e së enjtes me zë dhe figurë, kryeministri i Shqipërisë Edi Rama bëri një deklaratë që çuditi jo pak, duke pasur parasysh vendin dhe kontekstin ku u tha. Pas fjalës së kreut opozitar Lulzim Basha, ku i bëri thirrje qytetarëve të çoheshin për të protestuar kundër tarifës së rrugës së Kombit, e cila e pranuar ditën e sotme edhe nga vetë zoti Rama është mjaft e lartë.
Deklarata e Ramës në parlament shkaktoi një debat të madh mediatik, ku të shumta ishin edhe reagimet e Opozitës.
“Kjo puna e popullit është si puna e atij muhabetit që i thua atij të shkretit ngrihu-ngrihu por më kot se ai nuk ngrihet e rri me kokë poshtë. Është poezi që e di doktori, e di mirë ai këtë punë (duke iu referuar ish-kryeministrit Sali Berisha)“, tha Kryeministri.
Paralelizmi të cilin Rama bëri për popullin e tij është i qartë dhe nuk i lë shumë vend imagjinatës, për të mos diskutuar pastaj se sa etike është të nxirren këto fjalë nga një kryeministër në foltoren e parlamentit.
Paraditen e sotme zoti Rama doli në një konferencë për gazetarët, ku foli gjerësisht për debatin e tarifës në rrugën e Kombit, ku dha edhe sqarime për kontratën mes qeverisë dhe kompanisë koncensionare.
Gazetarja e Top Channel, në fund të konferencës e pyeti Edi Ramën edhe në lidhje me shprehjen e famshme, por sqarimi që bëri Rama ra disi në kontraditë me atë çfarë tha në parlament.
Gazetarja – Nuk besuat në seancë plenare që do të kishte protestë, dhe besoj e keni parasysh për cilën shprehje bëhet fjalë. Që nuk do të ngriheshin në protestë qytetarët. Dhe dje ata u ngritën në protestë, ndoshta edhe për shkak të një dështimi në komunikimin tuaj me qytetarët, duke tentuar të shkëlqeni në komunikim me kundërshtarin politik.
Rama – Shpjegimet e mia mund të kenë qenë të pamjaftueshme, e thash vetë dje, nuk e mohoj këtë gjë. Por për shprehjen në fjalë, ajo ka qenë krejt pa lidhje me këtë rast të posaçëm. Ka qenë e lidhur me thirrjen për revolucion, ngritjen në revolucion. Se kemi kohë që shikojmë aspiratën për revolucion.
Duke pasur parasysh që në parlament tema e diskutuar ishte specifike, natyrshëm lind pyetja, mos vallë protesta e qytetarëve të Kukësit bëri që kryeministri Rama të përgjithësonte një shprehje të personalizuar në një farë mënyre?
Në parlament kemi një kryeministër plotë me vetëbesim gati edhe cinik, ndërsa 4 ditë më vonë, pasi populli vërteton që di të çohet, Rama e kap deklaratën në një tjetër prizëm. Megjithatë të vërtetën e kësaj deklarate e di vetëm zoti Rama./Opinion.al
E.Sh
