Kuksianët janë të vendosur për të mos pranuar asnjë lloj takse për rrugën e Kombit, pavarësisht mënyrave të qeverisë për të justifikuar dhe diskutuar tarifat gjoja të ulura me qytetarët dhe grupet e interesit.
Para pak minutash grupi organizator i protestës për taksën e Rrugës së Kombit kundërshton skemën e taksimit të rrugës së propozuar nga qeveria dhe janë të vendosur siç ata thonë kundër taksës dhe pazareve të qeverisë me PPP-të në dëm të interesave të qytetarëve.
Kundërshtimet e grupit organizator janë për faktin se:
1. Skema vjen si pasojë e gjykimit të njëanshëm pa diskutuar paraprakisht me grupet e interest dhe pa konsideruar mendimet dhe propozimet e tyre.
2. Kjo skemë nuk e konsideron taksën si të padrejtë, por thjesht kamuflon mënyrën e pagesës.
3. Komisioni i qëndron kërkesës së mëparshme për taksë zero.
Qeveria prezantoi një ditë më parë paketën e negociuar për taksën në Rrugën e Kombit, e ndryshme për automjetet e vogla, autobusët dhe me lehtësira për banorët e Kukësit, por pritet të ketë sërish protesta.
Çfarë parashikon paketa lehtsuese?
Tarifimi i automjeteve të banorëve të Qarkut të Kukësit
Tarifë prej 100 lekë me TVSH për 1 kalim për të gjithë automjetet e regjistruara në Qarkun Kukës;
Tarifa e reduktuar do të jetë e kufizuar për jo më shumë se 44 kalime në muaj dhe e vlefshme për tu përdorur brenda peridhës 1 mujore nga data e kryerjes së pagesës për këto kalime;
Përdoruesit e Qarkut Kukës do të parablejnë në mënyrë të përshkallëzuar deri në 44 kalime me këtë tarifë të reduktuar;
Kjo skemë tarifore do të aplikohet për klasën e automjeteve A dhe B për përdorim vetjak, të regjistruara në Qarkun Kukës;
Për automjetet e cilësuara më lart, të regjistruara në Qarkun e Kukësit, do të marrin falas pajisjen elektronike Telepass dhe përmes saj do bëjnë rimbushjen e vlerës së kalimeve mujore sipas nevojës;
Tarifimi i autobusëve të linjës
Janë identifikuar 11 Linja të licensuara autobusësh që kryejnë udhëtime nga dhe për në qytetin e Kukësit;
Për të eleminuar efektin e tarifës në koston e udhëtimit të banorëve të Qarkut Kukës, këto linja do përfshihen në skemën preferenciale;
Këto mjete do të kenë tarifë Kalimi prej 100 lekë me T.V.SH për 1 kalim;
Tarifimi i përdoruesve të shpeshtë të rrugës pavarësisht vendosjes së tyre (kryesisht bizneset nga Shqiperia dhe Kosova):
Nga 20 deri në 30 kalime në muaj, përdoruesi i shpeshtë do të përfitojë një zbritje në masën 10%;
Mbi 30 deri në 50 kalime në muaj, përdoruesi i shpeshtë do të përfitojë një zbritje në masën 20%;
Mbi 50 deri në 60 kalime në muaj, përdoruesi i shpeshtë do të përfitojë një zbritje në masën 30%;
Mbi 60 kalime në muaj, përdoruesi i shpeshtë do të përfitojë një zbritje në masën 40%;
