Kukësi ka mundur Partizanin me rezultatin 1-0 në përballjen e parë të kampionatit. Sfida mes kampionëve dhe nënkampionëve të Shqipërisë u luajt në stadiumin “Elbasan Arena”.
Goli i vetëm i takimit u shënua në pjesën e parë me penallti nga Vasil Shkurtaj. Ekipi i Shpëtim Duros zhvilloi një pjesë të parë më të mirë se Partizani duke dominuar në mesfushë dhe duke krijuar raste të rrezikshme përpara portës në dy momente. Në minutën e 38-të Valon Ethemi u pengua brenda në zonën e Partizanit nga një ndërhyrje jo e rregullt e Boldor dhe kjo i dha penalltinë Kuksit.
Në pjesën e dytë Kukësi u përpoq ta administronte avantazhin ndërsa Partizani sulmoi më shumë. Sfida u bë më e nxehtë dhe kjo u reflektua në kartonat e shumtë nga të dyja anët. Në minutën e 63’ ndëshkohen me karton të kuq Solomon nga Partizani dhe Lulaj nga Kukësi pas një grindjeje mes tyre në fushën e lojës. Partizani do të godiste më vonë shtyllën me Malan por nuk arriti të bënte më shumë.
Lerda e nis me humbje sezonin ndërsa Duro merr një fitore të rëndësishme. /Opinion.al
