Nga Dritan Laci
Unë nuk e vej në dyshim që kryeministri im është një njohës dhe përdorues i mirë i lëmisë së shqipes së folur por edhe të shkruar, gjë që na e ka treguar kohë pas kohe në shfletimin e fjalorit të pasur që përdor në të folurën e tij publike ashtu edhe në statuset e shpeshta në rrjetet sociale, ku përpiqet ti gjymtojë kundërshtarët politikë me oratori të spikatur, të larmishme dhe gjetje fokloristike të goditura.
Por ky kompliment mëse i meritueshëm, nuk duket se mjafton për ta quajtur kryeministrin tim, një ruajtës po kaq të mirë të gjuhës shqipe, sidomos kur sot në rrjetet sociale fluturoi dhe u bë gaz i botës një shkresë plot gabime drejtshkrimore dhe kuptimore, që nuk e nderon aspak një institucion si Këshilli i Ministrave, që nuk ka për detyrë vetëm të firmosë shkresa por edhe të jetë korrekt në shkrimin e çdo dokumenti të dalë prej këtij institucioni.
Kush e mban mend, dhe besoj nuk do e kenë harruar, që në krye të herës, kur shkeli si Kryministër në krye të Ekzekutivit, Rama doli e tha dhe trumbetoi me të madhe, se nuk do të kishte më shkresa paçavure që mbajnë firmën e institucioneve, sa të ishte ai kryeministër. Madje tha që do të angazhonte redaktorë gjuhësorë nëpër institucione, në mënyrë që dokumentacioni shtetëror të ngjitej në lartësinë e merituar.
Kjo nismë u përshendet, kujtoj në vitin 2013, edhe nga akademikë, sjell në vemendje akademikun e ndjerë Jorgo Bulo, i cili e përshendeti nismën e kryeministrit të ri Rama, duke thënë se kjo nismë do ti jepte fund anarkisë gjuhësore në dokumentat shtetërore.
Por në fakt a ka ndodhur kështu?
Shkresa e cila mban vulën e Kryeministrisë, dhe që sot ka marrë arratinë në facebook, na tregon se shqipja në dokumentet zyrtare shtetërore jo vetëm që nuk i ka shpëtuar anarkisë gjuhësore, por tani kjo anarki mban edhe vulën e atij që vetë ngriti daullet për katastrofën ku ishte zhytur gjuha e shkruar shqipe.
Dhe kjo letër e sotme, nuk është e para.
Vetëm disa javë më parë Opinion.al publikoi një tjetër shkresë, po nga kryeministria, me firmë kësaj radhe të vetë kryeministrit, ku gabimet gjuhësore ishin aq të shumta, sa bëhet i pashmangshëm dyshimi; kush ia shkruan shkresat kryeministrit të Shqipërisë, meqënëse ai e ka shumë për zemër luftën kundër analfabetizmit?
Dhe për ta mbyllur; z. Kryeministër i Shqipërisë ku përfundoi projekti juaj për dhënien fund të anarkisë gjuhësore në dokumentet shtetërore?
Ku përfundoi projekti juaj për redaktorët gjuhësorë në institucione?
A është kjo shkresë Rilindja e gjuhës shqipe, që ju na e shitët si një zbulim në krye të ardhjes suaj si kryeministër?
*Më poshtë po ju bashkëngjisim shkresat që dalin sot nga Këshilli i Ministrave dhe gjithkush mund të shikojë gabimet gjuhësore që mbajnë këto shkresa
