Kryetari i Këshillit të Lartë të Prokurorisë, Gent Ibrahimi ka deklaruar se Struktura e Posaçme Anti-Korrupsion (SPAK) do të nisë të funksionojnë që nga shtatori ose fillimi i tetorit.
Në një intervistë për DW, Ibrahimi përshkruan se anëtarët e njësisë së posaçme që do të hetojë korrupsionin e zyrtarëve të niveleve të larta “u vlerësuan në bazë të 2 kritereve: aftësive profesionale dhe karakterit të fortë / vendosmërisë profesionale” dhe shtoi se 15 anëtarët e përzgjedhur “do të emërohen nga KLP, kur të kalojnë vettingun”.
Megjithatë ai pranon se jo të gjithë kandidatët për SPAK bëjnë pjesë në kategorinë e atyre që kanë përparësi për t’ju nënshtruar procesit të vettingut.
“Vettingu ka nisur sipas një rendi të paracaktuar në ligj. Të parët vettingut i nënshtrohen gjyqtarët e Gjykatës së Lartë dhe asaj Kushtetuese, Kryetarët e Gjykatave dhe prokurorët e Prokurorisë së Përgjithshme, të Prokurorive të Apelit, drejtuesit e Prokurorive në rrethe dhe gjyqtarë të Gjykatave të Apelit. 15 kandidatët për prokurorë në SPAK jo domosdoshmërisht i përkasin kategorive të mësipërme. Ka nga ata që ende nuk kanë filluar vettingun, të tjerë i kanë kaluar të gjitha fazat e vettingut apo janë në një fazë më të hershme. Tani që dihet lista e kandidatëve ata do të kenë prioritet që t’i emërojmë sa më parë” u shpreh Ibrahimi.
Ai shpjegoi se “sipas Kushtetutës, SPAK nuk mund të ketë më pak se 10 prokurorë” dhe se kjo njësi e re ka tre faktorë të rëndësishëm që përligjin pritshmëritë se do të fillojë “çmontimin e pandëshkueshmërisë” në nivele të larta.
Prokurorët e SPAK janë të pavarur, sqaron kreu i KLP duke u bazuar tek mos pasja e një eprori që ti ndryshojë punën.
“Para reformës në drejtësi dhe ndryshimeve kushtetuese një prokuror i lartë kishte të drejtë të ndryshonte gjithçka në punën e një prokurori në pozicion më të ulët. P.sh. nëse një prokuror i një niveli më të ulët vendoste fillimin e një çështjeje penale eprori i tij mund të vendoste mosfillimin e saj ose anasjelltas. Sot kjo varësi është çmontuar jo vetëm për SPAK por për çdo prokuror. Prokurorët e SPAK kanë një mandat 9 vjeçar, janë të pashkarkueshëm, ndryshe nga prokurorët e tjerë që shërbejnë me një afat të përcaktuar dhe mund të lëvizin nga KLP nga një zyrë në tjetrën. Nëse një prokuror i SPAK ka kryer shkelje disiplinore për ta shkarkuar duhen 2/3 e 11 anëtarëve të KLP, gjë që vështirë të arrihet në kushte normale”
Së dyti ai thekson se kjo njësi do të ketë policinë e saj gjyqësore (BKH) e cila nuk do të varet nga Ministria e Brendshme kështu që “hetimet do të kryhen në një sekret më të madh” sipas Ibrahimit pasi “me SPAK hetimi do të zhvillohet brenda një zyre të vetme, nga një grup njerëzish që janë në lidhje profesionale dhe hierarkike me njëri- tjetrin”.
Fakti që këta prokurorë do të jenë gjithë kohës të monitoruar për kreun e KLP është një arsye më shumë që e përligj misionin e tyre.
“Ata janë gjithë kohës të monitoruar. Sa herë që flasin në telefon e dinë që dikush i regjistron, llogaritë e tyre bankare janë të aksesueshme” deklaroi Ibrahimi duke shtuar se “Çdo institucion ka rrezikun e kalbëzimit nga brenda. Edhe prokurorët e SPAK mund të bëhen viktima të korrupsionit. Por ata do të jenë nën kontroll të vazhdueshëm nga brenda institucionit. Nga ana tjetër për ta minimizuar mundësinë e rënies pre të korrupsionit pagat e tyre u japin mundësi të jetojnë me dinjitet pa u korruptuar. Prokurori i SPAK e ka pagën mujore 1500 euro që ditën e parë të punës. KLP i ka propozuar qeverisë t’i rrisë deri në 2.500 euro”.
Sa i përket punë aktuale të SPAK, Ibrahimi sqaroi se kjo njësi “do të trashëgojë nga Prokuroria e Krimeve të Rënda rreth 90 % të portofolit të kësaj prokurorie” madje sipas tij “Portofoli i SPAK do të jetë më i pasur nga ai i Prokurorisë së Krimeve të Rënda”
Në përfundim të intervistës Ibrahimi sqaroi procedurën e krijimit të Byrosë Kombëtare të Hetimit, pa të cilën SPAK nuk e nis dot punën.
“Kryeprokurori i SPAK do të rekrutojë drejtuesin e BKH dhe të dy bashkë do rekrutojnë oficerët e policisë gjyqësore, pra hetuesit e BKH. Pas përzgjedhjes ata do të trajnohen nga ekspertë amerikanë të FBI, gjë që do të marrë disa muaj. Por SPAK do të fillojë punën duke përdorur oficerët e policisë gjyqësore të Prokurorisë së Krimeve të Rënda, derisa të ngrihet BKH” deklaroi ai. /Opinion.al
