Kryeministri Edi Rama ka reaguar për një kronikë të publikuar në edicionin qendror të lajmeve në televizionin Italian, RAI 3, të hënën në mbrëmje. Sipas shefit të qeverisë shqiptare ky lajm është një turp gazetaresk, pa asnjë lidhje me realitetin e monitoruar dhe certifikuar nga vetë Guardia di Finanza!
“Uroj që partnerët tanë të shkëlqyer ta thonë vetë pa humbur kohë të vërtetën”, shkruan shefi i qeverisë shqiptare.
Çfarë thotë kronika
Përmes disa fotove të marra nga një raport konfidencial policor në vend nga gazetarët e Rai 3 dallohen rreth 100 mijë bimë të ndara të fshehura në male. Sipas gazetarëve italianë pak muaj më parë Drejtori i policisë kriminale, është shprehur se operacionet e policisë të bëra në vitin 2014 kanë nisur procesin zhdukjen përgjithmonë të prodhimin e marijuanës në Shqipëri.
Raporti i vitit të kaluar tregon se u gjetën më pak se 1000 bimë por sipas gazetarëve të Rai 3 të dhënat e këtij raporti të ri, ende i rezervuar tregon një realitet tjetër.
Sipas prokurorit italian Giacomo Cataldi përmes këtyre trafiqeve të drogës, ku Shqipëria është një nga prodhuesit më të mëdhenj është bërë i mundur përftimi i shumave të mëdha të parave nga mafia shqiptare.
Reagimet
Këtë të martë dy forcat politike opozitare në vend, PD dhe LSI, reaguan duke thënë se rritja me 1200 përqind e kanabisit në vend, sipas kronikës, është dështim i Ramës.
Ervin Salianji: Dëshmia e sjellë nga Rai 3 dëshmon dështimin e Edi Ramës dhe Sandër Lleshajt në plotësimin e një prej kushteve kryesore të Bundestagut për nisjen e negociatave- luftën kundër krimit të organizuar. Në Shqipëri, krimi i organizuar jo vetëm nuk po luftohet, por, i mbrojtur nga partia në pushtet, është shndërruar në lojtar kryesor në trafikun ndërkombëtar të narkotikëve. Prej 6 vjetësh, nuk ka asnjë bos të krimit të organizuar në burg. Nuk ka asnjë bos të trafikut të drogës të arrestuar. Burgjet e Sandër Lleshajt kanë mbushur me opozitarë që protestojnë kundër qeverisë së lidhur me krimin dhe me të varfër që punojnë parcelat me kanabis. Bosët janë të gjithë të lirë, sepse i sigurojnë Edi Ramës para për të blerë votat dhe për të mbajtur në këmbë projektin e tij për vjedhjen e zgjedhjeve dhe kapjen e drejtësisë. Reportazhi i Rai 3 rrëzon propagandë prej miliona eurosh të qeverisë se ajo e ka asgjësuar kanabisin. Vetëm pak ditë më parë u kapën në Greqi 1.2 ton drogë, ndërsa në brigjet italiane kjo është një ngjarje e zakonshme.
Petrit Vasili: Shqipëria është bërë sipas autoriteteve të antimafias italiane një nga prodhuesit më të mëdhenj të drogës, përveçse një pikë tranziti dhe përveçse një urë komunikimi me Amerikën Latine. Pra në vend gëlojnë trafikantët dhe kriminelët përkundrejt mashtrimit të pacipë dhe sistematik që bën kryeministri i vendit, ministri i tij i papërgjegjshëm dhe sigurisht i inkriminuar i brendshëm Lleshaj dhe kundrejt këtij realiteti tragjik që po shkatërron dhe po rrënon vendin publikohen demagogji pafund.
Sigurisht rruga e Europës mbyllet nga kanabisi dhe nga trafiku i kokainës i të gjitha formave. Pikërisht për këtë arsye, Shqipëria figuron si një vend i kriminalizuar kundrejt mijëra shqiptarëve të ndershëm e të varfër, të cilët duan të punojnë me punë të ndershme dhe të pastër dhe nuk kanë të bëjnë me këtë veprimtari kriminale rrënuese. Shqipëria që në 20014, sërish në një qeverisje socialiste, por jo rilindase, e cila hiqej nga harta e vendeve nyje për trafikimin. Sot përkundrazi, jo vetëm është pikë trafiku kyç dhe shumë e rëndësishme, por është kthyer dhe në një kultivuese e rëndësishme në nivel ndërkombëtar, një nga prodhuesit kryesor të marijuanës.
Kronikën e Rai 3 mund t’a shikoni duke klikuar KËTU/ minuta 27:56
