Ish-Presidenti i Republikës Alfred Moisiu i ftuar në “Ora News” është shprehur se partitë politike duhet të gjejnë një marrëveshje mes tyre, në mënyrë që t’i japin fund krizës.
Por, ish-Presidenti thekson se dialogu mes pozitës dhe opozitës nuk mund të krijohet me kushte të paracaktuara.
Po ashtu, Moisiu tha se problemet e brendshme politike duhet t’i zgjidhim vetëm dhe jo të presim përfshirjen e ndërkombëtaren.
Alfred Moisiu: Pazaret asnjëherë nuk janë ato që duhet të jenë, japin zgjidhje të përkohshme. Unë mendoj se politika shqiptare duhet të mbledhë mendjen, se ka një përgjegjësi të madhe para popullit. Po mbushen 30 vjet që ne lundrojmë me mendje në demokraci por për fat të keq, demokracinë nuk po e arrijmë sic duhet, jo se është e paaritshme, por për vetë kushtet që politika krijon.
Këto punë duhet ti zgjidhim vetë, sepse gjithmonë bëj sherre dhe sytë i mbajmë nga qielli, cili do vijë me avion, kjo nuk është normale. Politika në gjithë botën ka probleme, por siç i krijojnë ashtu i zgjidhin. Për fat të keq ne bëjmë atë që nuk duhet bërë. Kështu si ka ardhur koha jo se nuk zgjidhen, ju përmendët 2007. Është e vërtetë që ne qëndruam 48 orë, por u morën vesh me njëri-tjetrin, u gjet cfarë kërkonte njëra palë, jo të gjitha u plotësuan, por u gjet një zgjidhje.
Duhet vullnet politik. Nëse ne duam të bëjmë vetëm zhurmë dhe duam të arrijmë disa qëllime që nuk i themi publikisht, nuk i themi hapur, por në fakt ato na shtyjnë.
Gjatë këtyre viteve janë bërë shumë zullume, abuzime dhe mashtrime. Dhe ne po të njëjtët politikanë i kemi akoma në krye të punëve. Do vijë një kohë që do kërkohet përgjegjësi dhe llogari. Reforma në drejtësi këtë qëllim ka. Nuk ka thjesht qëllim që gjyqtarët e korruptuar ti mënjanojmë, por duke stabilizuar drejtësinë ajo do stabilizojë dhe politikën. Deri tani nuk kemi asnjë politikan prapa hekurave që e meritojnë.
Beti Njuma: Ka shqipëria politikanë që e meritojnë?
Alfred Moisiu: Çdo njëri që të pyesësh do thotë ka. Dhe unë nuk mund të them ndryshe, që s’ka se për këtë po flas. Nuk mund të hysh në dialog me kushte, në dialog duhet të hysh të bisedosh, duke pasur parësore fatet e kombit, vullnetin e popullit dhe të ardhmen e vendit. E na vjen çudi pastaj që të tjerët thonë shqiptarët janë kriminelë, hajdutë etj. Kriminelë dhe hajdutë ka kudo, por në vendet e tjera këta dënohen, këtu te ne nuk dënohen. Këtu dënohet një polic, dënohet një infermier, një mjek, por luanët janë në strofkullën e tyre dhe japin komanda. Ka ardhur koha që të japin llogari, nuk kanë ku shkojnë, lodhen kot. Kjo duhet të jetë mësim edhe për të rinjtë.
Më herët, Moisiu ka deklaruar që Presidenti Ilir Meta duhet të marrë të dyja palët në një tryezë për t’i dhënë fund krizës politike në vend./ Opinion.al E.Xh.
