Anthony Joshua thotë se po qëndron i fortë “si një ushtar” për prindërit e dy miqve të tij të ngushtë që humbën jetën në një aksident automobilistik, ndërsa kampioni britanik i peshave të rënda përgatitet për rikthimin e tij në boks.
Dy herë kampioni i botës ishte pasagjer në makinën ku vdiqën Sina Ghami dhe Latif “Latz” Ayodele në Nigeri, në dhjetor. Joshua pësoi vetëm lëndime të lehta në aksident. Në ndeshjen e tij të parë pas aksidentit, ai do të përballet me boksierin shqiptar Kristian Prenga në Jeddah më 25 korrik.
“Nuk e kapërcen kurrë plotësisht, por fiton një perspektivë tjetër për jetën,” tha Joshua, 36 vjeç.
“Jeta të përul ndonjëherë. Nuk e di kurrë fatin e askujt. Si ushtar, qëndroj i fortë para së gjithash për prindërit e tyre. Kjo nuk ka të bëjë me mua. Mendoj se është e rëndësishme që në këtë moment të vendosim prindërit e tyre në plan të parë. Do të vijë edhe koha ime për të vajtuar. Por tani zemra dhe mendja ime më thonë se prioriteti im kryesor janë prindërit e tyre”, tha Joshua.
Fituesi i medaljes së artë olimpike në vitin 2012 foli para konferencës për shtyp në Londër, ku u përball për herë të parë ‘sy më sy’ me Prengën.
Një fitore ndaj shqiptarit do t’i hapte rrugën një përballjeje të shumëpritur me Tyson Fury më vonë gjatë këtij viti. Për më shumë se një dekadë, Joshua dhe Fury kanë qenë figurat kryesore të boksit britanik në kategorinë e peshave të rënda, por nuk janë ndeshur kurrë mes tyre.
Sipas raportimeve, ekziston tashmë një marrëveshje dhe të dy boksierët pritet të fitojnë honoraret më të mëdha të karrierës së tyre kur të takohen në ring, me muajt tetor ose nëntor.
Megjithatë, kjo ndeshje do të realizohet vetëm nëse Joshua kalon me sukses sfidën ndaj Prengës. Ndërkohë, Fury po planifikon gjithashtu një duel paraprak, me shumë gjasa në Dublin më 1 gusht, kundër një kundërshtari që ende nuk është bërë publik.
“Bota e Joshuas u shemb”
Promotori Eddie Hearn tha se Joshua ishte “i lumtur dhe i emocionuar për vitin 2026” pas fitores së dhjetorit ndaj Jake Paul dhe se kishte plane për t’u përballur me Rico Verhoeven në mars, përpara se të ndeshej me Fury në gusht.
“Pastaj, vetëm 10 ditë më vonë, ndodhi aksidenti. Dhe bota e tij u shemb,” tha Hearn.
Kur nisi konferenca për shtyp, vëmendja kaloi te sfida e ardhshme. Joshua, i veshur me tuta sportive dhe syze dielli, foli për një ndjenjë të re përqendrimi.
“Ende e kam atë zjarr brenda meje dhe e di se këtu e kam vendin. Nuk e bëj këtë si shaka. E bëj sepse është ajo që di të bëj më mirë. Do ta dëshmoj këtë këtë vit dhe do të vazhdoj ta dëshmoj edhe në të ardhmen”, tha britaniku.
Ai foli gjithashtu për ambicien për t’u bërë kampion bote për herë të tretë dhe për bashkëpunimin e tij me ish-rivalin dhe tashmë partnerin e stërvitjes, Oleksandr Usyk. Sipas Joshuas, puna me Usykun e ka ndihmuar të përmirësojë formën fizike në boks, inteligjencën taktike dhe mbrojtjen.
“Tani mund t’i lexoj përsëri shumë mirë goditjet. Sytë e mi janë plotësisht të fokusuar,” tha ai.
Prenga gati të “tronditë botën”
Prenga vjen me një bilanc mbresëlënës në letër, 20 fitore, të gjitha me nokaut ose ndërprerje dhe vetëm një humbje. 35-vjeçari jeton aktualisht në New Jersey dhe hyn në ndeshjen më të madhe të karrierës së tij si jofavorit.
“Po stërvitem fort. Jam stërvitur më shumë se kurrë. Ndihem shkëlqyeshëm. Ndihem gati. Besoj se do ta trondit botën,” tha mirditori.
Tri ndeshjet e fundit të Prengës kanë përfunduar që në raundin e parë, por ai nuk është përballur kurrë me një kundërshtar të kalibrit të Joshuas dhe mbetet relativisht i panjohur edhe për shumë tifozë të apasionuar të boksit.
Në letër, Joshua duhet ta mposhtë Prengën pa shumë vështirësi. Megjithatë, boksi i peshave të rënda ka prodhuar shpesh surpriza të mëdha.
“Jam i lumtur që ai po më nënvlerëson,” tha Prenga, duke insistuar se nuk do t’i tregojë asnjë respekt Joshuas sapo të bjerë gongu i parë. “Nuk do të ndodhë (ndeshja e Joshuas me Furyn). Do ta anuloj atë ndeshje. Ata thjesht duhet ta anulojnë atë ndeshje. Do të fitoj më 25 korrik. Do t’i tregoj për grushtet e shqiptarëve. Ti je një boksier dhe luftëtar i mirë, por në ring s’kam respekt as për tim atë”, tha Prenga.
Joshua iu përgjigj: “Dua që të hysh në ring pa më treguar asnjë respekt dhe të përpiqesh të bësh atë që mendon se di të bësh më mirë. Sepse përballë teje do të jetë dikush që do të bëjë pikërisht të njëjtën gjë”, tha Joshua.
Të dy boksierët qëndruan përballë njëri-tjetrit për më shumë se një minutë gjatë ceremonisë së zakonshme. Joshua hoqi syzet e diellit, ndërsa gjithçka përfundoi me një shtrëngim miqësor duarsh.
