Komisioni Qendror i Zgjedhjeve (KQZ) ka rrëzuar kërkesën e PD-LSI për të dërguar anëtarët e tyre pranë KZAZ-ve. Me 1 votë pro dhe 4 kundër, kërkesa e opozitës u refuzua.
Në përfundim të mbledhjes përfaqësuesi ligjor i PD, Ivi Kaso u shpreh për mediat se ky vendim është në kundërshtim me kodin zgjedhor dhe kushtetutën. E drejta për të patur komisionerë në KZAZ buron nga fryma e ligjit tha ai dhe se ky vendim do të ankimohet si në gjykatë dhe ndërkombtarisht në institucionet përkatëse
“I mohuan Partisë Demokratike të kenë komisionerë, kjo e drejte i buron nga fryma e kodit zgjedhor, konkretisht neni 28 dhe 29 i kodit zgjedhor. Kandidaturat që ne kishim propozuar ishin ne përputhje me kriteteret ligjore por KQZ nuk ka pasur një arsye ligjore përveç urdhrit politik të drejtpërdrejtë. Mazhorancën me në krye Ramën e ka zënë tmerri nga zbulimi i paligjshmërie që po bëhen. Opozita dhe PD do të ndjekin çdo hap ligjor për ta kundërshtuar këtë vendim. Denoncimet do të bëhen për të gjithë shkelësit e ligjit duke filluar që nga anëtarët e KQZ”, tha Kaso.
*Debate të forta në KQZ për kërkesën e PD-së*
Debate të ashpra në Komisionin Qëndror të Zgjedhjeve në lidhje me kërkesën e opozitës për të regjistruar komisionerët në zgjedhjet e 30 qershorit. Ivi Kaso ka deklaruar se kjo kërkesë bëhet sepse ka denoncime të shumta që procesi po mbushet me paligjshmëri.
Përfaqësuesi ligjor i Partisë Demokratike tha më tej se anëtarët e KQZ-së po veprojnë në kundërshti me ligjin kur argumentojnë kundër kërkesës së opozitës dhe kjo do të ketë përgjegjësi penale për ta.
“Në gjysmën e zonave zgjedhore procesi zgjedhor ofron garë vetëm me një kandidat. Opozita do i vërtetojë shqiptarëve se ky kryeministër nuk organizon dot zgjedhor edhe kur garon i vetëm. Në emër të opozitës i bëj thirrje anëtarëve të KQZ-së ta trajtojë këtë vendimmarrje me seriozitetin maksimal dhe në përputhje me të drejtën ligjore. Mos të bien pre e presioneve nga eksponentë të lartë të mazhorancës që e kanë shprehur hapur kundërshtinë për këtë vendimmarrje. Paralajmëroj anëtarët e KQZ-së se do të përballen me përgjegjësi penale nëse shkelin ligjin”, u shpreh Kaso.
Kjo deklaratë e Kasos nuk u prit mirë nga anëtari i KQZ-së, Denar Biba i cili e cilësoi këtë si ‘shantazh drejtuar anëtarëve të komisionit‘.
Debati më pas është zhvendosur mes Kasos dhe Eridjan Salianjit të PS-së. Ky i fundit ka pyetur përfaqsuesin e partisë demokratike mbi qëllimin e dërgimit të komisionerëve nga ana e opozitës. “PD-ja kërkon komisionerë apo vëzhgues?” pyeti Salianji.
“Në bazë të nenit 63, Kodi Zgjedhor, që të jesh subjekt zgjedhor duhet të jesh i regjistruar me listë kandidatësh, pastaj të lind e drejta për të menaxhuar procesin”, shtoi më tej Salianji.
Kaso u përgjigj se “Komisionerët përcaktohen përpara se partitë të regjistrohen në zgjedhje”. /Opinion.al
