Prokurori i Prokurorisë për Krimet e Rënda, Ened Nakuçi, po përballet në një seancë dëgjimore këtë të enjte me Komisionin e Pavarur të Kualifikimit.
Ened Nakuçi është një nga prokurorët e dosjes “Shullazi”, si dhe një prej kandidatëve për t’u bërë pjesë e Strukturës së Posaçme kundër Korrupsionit dhe Krimit të Organizuar. Që prej vitit 2004 ai ka punuar si prokuror te Krimet e Rënda. Në lidhje me dosjen “Shullazi” rezulton se subjekti ka ndjekur çështjen, por nuk ka marrë pjesë bë pretencë. Subjekti ka braktisur detyrën duke u larguar jashtë vendit, pa ia kaluar dosjen kolegëve të tij. Subjekti e ka argumentuar largimin me arsye shëndetësore.
Sipas ILDKPI, Nakuçi ka bërë deklarim të saktë, nuk ka deklarim të rremë, si dhe nuk ka fshehje të pasurisë.
Gjatë seancës së sotme u zbulua se Nakuçi ka një apartament 136 m2 në Tiranë, për të cilin ka paguar 19 mijë $ në datën 3.9.2003 dhe 23 mijë $ të tjera në vitin 2006 me marrjen e çelësave.
Në vitin 2003 Nakuçi nuk ka deklaruar shumën e plotë të pasurisë por vetëm shumën e paguar atë vit. Burimi i atyre parave kanë qenë të ardhura nga pagat dhe borxhe nga e ëma, motra dhe xhaxhai. Po kështu, me borxhe nga të afërmit ka realizuar edhe pagesat në vitet 2004 dhe 2005, edhe pse sipas KPK nuk ka dokumentim për këtë.
Nakuçi rezulton gjithashtu të jetë bashkëpronar në një apartament tjetër 73 m2 përfituar me një kontratë në vitin 2010. Burimi i parave për këtë blerje ka qenë shitja e apartamentit 92 m2 në të cilin ka jetuar me prindërit, të ardhura nga pagat si edhe një borxh. Rezultoi se apartamenti është blerë 10 milionë lekë. Shuma e marrë borxh para noterit është 17 mijë euro, tek daja i bashkëshortes, borxh i kthyer pas marrjes së një kredie. Për këtë pasuri, komisioni konstaton mospërputhje të deklarimeve të subjektit, nuk dokumentohet burimi i një vlere prej 5600 eurosh.
Për sa i përket figurës së prokurorit, DISK konstaton përshtatshmëri të Nakucit për ushtrimin e detyrës. Sa i përket aftësive profesional, nga pesë dosjet e përzgjedhura me short rezulton se në një prej tyre, në vitin 2014 Nakuçi ka vendosur të mos fillojë procedimi pas 4 vjet hetimesh.
Nuk rezulton qe Nakuçi të ketë masa disiplinore për punën. Në tre vjet ka marrë vlerësim “Shumë mirë” nga Prokuroria e Përgjithshme. /Opinion.al
