Ka humbur jetën si pasojë e koronavirusit pedagogia e Universitetit të Vlorës Dafina Brokaj. Mësohet se ajo ishte e shtruar prej disa ditësh në një prej spitaleve COVID në Tiranë për shkak të gjendjes shëndetësore të rënduar.
Brokaj ka qenë pedagoge, ish- drejtoreshë e qytezës studenti në qytetin e Vlorës, ndërsa së fundmi kishte punuar në disa shkolla jo-publike.
Në lidhje me ndarjen nga jeta të Dafina Brokaj ka reaguar edhe Zyra Vendore e Arsimit Parauniversitar Vlorë-Himarë.
Në një postim në rrjetet sociale zyra vendore e arsimit shkruan: “Respekt e mirënjohje për mësuesen dhe drejtoreshën e palodhur, zonjën DAFINA BROKAJ! Sot COVID na shënjoi përsëri me një humbje që dhemb. I paharruar kujtimi i saj dhe u prehtë në paqe! Një profesioniste e shkëlqyer, model i qytetarisë, kolege e respektuar, nënë vetëmohuese, një grua e fortë dhe e rrallë që i dha këtij qyteti një kontribut mbi 40-vjeçar në fushën e arsimit. Do të na mungojë! Respekte dhe ngushëllime familjes!”/ Opinion.al
