Futboll Klub Skënderbeu ka reaguar në lidhje me ndeshjen e zhvilluar ditën e diel, në orën 17:00, në stadiumin “Elbasan Arena” të qytetit të Elbasanit, midis Partizanit të Tiranës dhe Skënderbeut të Korçës: “Ne si klub dënojmë rëndë të gjitha ngjarjet e ndodhura para dhe gjatë takimit, të cilat vijnë si pasojë e dështimit të organizimit të ndeshjes. Një dështim i turpshëm, i cili la pasoja morale, material, por edhe administrative. Pasojat morale përfshijnë drejtues, lojtarë dhe tifozët e Skënderbeut, ata që ishin prezent, por edhe ata që e kanë ndjekur takimin nga TV. Sharje dhe ofendime, jo në tribunën e ultrasve, por edhe në atë VIP të stadiumit. Pasoja materiale në “mikëpritjen” e tifozëve korçarë në Elbasan. Gurë dhe sende të tjera të forta drejt autobusëve të tifozëve tanë, duke thyer xhamat.
Tifozëria nga Tirana është shoqëruar me eskortë policie nga kryeqyteti dhe sigurisht që kjo gjë nuk ndodhi me tifozërinë tone, gjë që vërtetohet shumë lehtë nga pamjet filmike. Acarimi i tifozërisë korçare në stadium ka një arsye shumë të fortë, goditja e tyre dhe e autobusëve në momentin që ato i afrohen stadiumit. Ka pasoja administrative për faktin që ekipi organizator bëri të pamundurën për ta fituar takimin, me çdo mënyrë, duke shtuar presionin te gjyqtarët, por pa ia arritur dot qëllimit, pasi ndeshjet fitohen në fushën e lojës e jo në tribunat VIP të stadiumit. Nuk janë drejtuesit, ata që luajnë, as tifozët, por futbollistët në fushën e blertë. Një presion shumë i madh për gjyqtarët e ndeshjes, të cilët nuk arritën të nxirrnin kartonin e dytë të kuq për lojtarin e ekipit kundërshtar.
Ndërhyrje brutale, të cilat duheshin ndëshkuar, por e kuptojmë që për shkak të presioni të madh, që u krijua, gjyqtari nuk arriti ta ndëshkonte. Gjithë ky presion ndikoi në ecurinë e ndeshjes, pas minutës së 65-të të lojës. Gjatë gjithë kohës ishte pështjelluar një situate, e cila degjeneroi në sharje, ofendime dhe në dhunë drejt tifozëve. Të tilla skena në stadiumin e Korçës nuk mund të imagjinohen e jo më të ndodhin. Një dëshmi e gjallë është sfida e fundit e sezonit të kaluar në Korçë, midis Skënderbeut dhe Partizanit, ku ekipi mik fitoi përballjen direkte me rezultatin 0-1. Çfarë incidenti ndodhi? ASGJE! Edhe një herë bëjmë thirrje që të merren masa drastike dhe të ndërgjegjësohen klubet. Të merren masat e duhura për organizimin e një ndeshjeje normale. Futbolli luhet në fushën e blertë dhe le të fitojë ai që e meriton.”
