Nëpërmjet një shkrimi në portalin Lapsi.al, gazetari Andi Bushati, ka komentuar intervistën e kryeministrit Edi Rama dhënë për TV Klan. Ndër të tjera, Bushati shkruan se kryeministri është shfaqur i qetë dhe i sigurtë në ekranin e tij të preferuar, për të folur edhe njëherë për koalicionin e zgjedhjeve të ardhshme me LSI-në.
Sipas Bushatit, përgjatë asaj interviste, po t’i dëgjoje me kujdes fjalët nuk ishte e vështirë të qëmtoje dy elementë.
Së pari notat e ironisë. Kryeministri e la të hapur edhe një rimartesë të re të LSI-së me PD-në dhe këtë nuk e kumtoi, as si një dramë, as më me tonet patetike të viteve më parë, kur këto pirueta i quante si “tradhëti mijra zemrash të majta”.
Elementi i dytë që binte në sy, ishte vetësiguria. Në intervistën e vet, toni, qetësia, mimika dhe yshtja për të bërë humor, sikur kërkonin të thonin të gjitha bashkë: “kot më pyesni, Ilir Meta nuk ka ku shkon”.
Në vazhdën e këtyre dy argumentave, ai shkruan se një gjë është e qartë, që pas miratimit të reformës në drejtësi këtë verë, raportet mes Metës dhe Ramës kanë ndryshuar ndjeshëm në favor të të dytit. Po të mbetemi tek krahasimi i elementëve gjuhësorë, kryeministri nuk e përdor më as togfjalëshin “dy bashkëdrejtuesit e koalicionit” as atë “dy partitë udhëheqëse të aleancës”.
Kjo siguri ka buruar edhe nga fakti se LSI-ja, me përjashtim të ndonjë batute të Luan Ramës apo Ylli Manjanit, i ka votuar me bisht në shalë të gjitha mëkatet e Rilindjes. Ajo nuk është bërë pengesë, as për koncesionet dhe tenderat, as për shefat e policisë që marrin 30% e hashashit, as për lejet e ndërtimeve dhe ligjet antipopullore që i ka kaluar me lehtësinë më të madhe.
Ndërkaq, Bushati thekson se zgjedhjet në Dibër i’a konfirmuan, se votën klienteliste mund ta mbledhë me çfarëdo aleati tjetër, të korracuar me paratë e hashashit dhe kriminelët që rekruton përditë pushteti.
Prandaj, ai pothuajse nuk ka më nevojë për Metën. Ashtu sikuse tregoi edhe intervista e kësaj të diele, edhe nëse do të ulet të negocjojë , ai do të tentojë ta bëjë nga pozitat e padronit me vasalin.
