Në pikën e kontrollit teknik në kryeqytet po bëhen testimet e fundit të sistemit. Shërbimi i kolaudimit do të nisë të ofrohet për të gjithë automjetet në të gjithë vendin në pikat ku është ofruar dhe më parë, të hënën më 31 Maj.
Fillimisht kontrolli do të nisë me mjetet e rënda, makinat që kanë ngelur në kolaudim dhe automjetet e regjistruara për herë të parë në territorin e Shqipërisë.
Blendi Gonxhe, Drejtor i Shërbimit të Transportit Rrugor, thotë se numërohen afro 150 mijë mjete që duhet të marrin këtë shërbim, ku të dytët me përparësi do të jenë kategoritë e veçanta.
“Radha më pas do të jetë për taksitë, autobusët, flotat e makinave shtetërore, kategori që duhet të bënin kontrollin çdo 6 muaj, por që në bazë të ligjit të ri janë të detyruar ta kryejnë njëherë në vit. Kemi besim se do të kthehemi në normalitet në fund të verës”.
Gonxhe u kërkon qytetarëve që të shfrytëzojnë disa forma komunikimi për rezervime në mënyrë që të mos krijohen radhë dhe më pas të rezervojnë përmes e-Albania.
“Në asnjë rast nuk duhet të dynden të gjithë. Ne do të kontaktojmë vetë në format e komunikimit që kanë lënë pranë nesh qytetarët në bazë të targës së mjetit, përmes mesazheve në e-Albania por dhe në dy numrat e shërbimit call center në faqen tonë të internetit që të lenë orarin e takimit”.
Të gjithë automjetet e vogla që nuk janë kategori e veçantë të cilëve u ka skaduar kolaudimi pas datës 24 Dhjetor 2020, nuk do të kenë nevojë të bëjnë kontroll menjëherë, por taksat vjetore duhet të paguhen rregullisht.
“Për çdo automjet pas kësaj date shtyhet automatikisht afati dhe me 12 muaj”.
Tashmë kolaudimi do të bëhet njëherë në 2 vjet për të gjithë automjetet, por kontrolli do të jetë më i rreptë për serviset dhe mjetet që qarkullojnë në rrugë.
“Ne do të fokusohemi te cilësia. Do të kemi në fokus serviset dhe kontrollet në rrugë me qendrat e lëvizshme”.
Kjo do të jetë certefikata e re e kontrollit teknik të autmojeteve, me kontrolle të shtuara dhe me barcode elektronik i cili nuk lejon mundësinë e falsifikimi të saj./Tv Klan
