Ushtria kineze tha se ka dërguar trupa të reja në Hong Kong.
Pamjet e automjeteve të blinduara duke kaluar kufirin nga qyteti Shenzhen për në Hong Kong, kanë rritur shqetësimet se ushtria kineze mund të ndërhyjë kundër protestuesve dhe mund të vendoset në rajonin gjysmë-autonom.
Ushtria kineze ka mohuar diçka të tillë, duke e cilësuar këtë si aksion rutinor, megjithatë qytetarët e Hong Kongut mendojnë se e gjithë “shfaqja” po bëhet për të krijuar panik dhe terror tek ta.
Nga ana tjetër Hong Kongu, po përgatitet për një tubim të ri politik, të shtunën. Protestat kanë nisur prej muajit mars, për shkak të një projektligji që do të mundësonte ekstradimet në Kinë.
Edhe pse autoritetet kanë pezulluar projektligjin, protestat janë zgjeruar në një lëvizje më të gjerë kundër qeverisë dhe ndikimeve të Kinës. Hong Kongu, ish-koloni britanike, është pjesë e Kinës, por gëzon liri unike që nuk shihen në pjesën tjetër të shtetit./Opinion.al
