Është mbajtur mesditën e sotme nga ora 12:00 deri në orën 14:00 mbledhja e Këshillit të Sigurisë Kombërare thirrur nga Presidenti Nishani me kërkesë të Ilir Metës. Në mbledhje ka mungur Kryeministri Rama. Mbledhja kishte si objekt mosarrestimin e boss-it të drogës Klement Balili, i kërkuar nga policia greke dhe i hetuar nga DEA amerikane.
Mbledhja është zhvilluar me dyer të mbyllura dhe nuk ka patur asnjë deklaratë nga pjesëmarrësit. Është Presidenca ajo që përmes një njoftimi zyrtar zbardh disa fragmente të mbledhjes. Presidenca përmend vetëm fjalën e Nishanit dhe Metës, ku theksohet se mosarrestimi i Balilit ka bërë që ndërkombëtarët të humbasin besimin tek institucionet ligjzbatuese shqiptare (polici, prokurori).
Nishani: Çështja ‘Balili’ është përtej nivelit kombëtar i tejkalon përmasat individuale të rastit në fjalë, sepse ajo është shtrirë dhe ka marrë përmasa të zgjeruara gjeografike në disa shtete fqinje dhe aleate”. Për këto arsye, ka thënë Nishani “mbledhja e sotme u thirr pikërisht për të diskutuar, përcaktuar dhe këshilluar mbi hapat e marrë, ndjekjen dhe vijueshmërinë e veprimtarive institucionale të agjencive ligjzbatuese lidhur me hetimin e mëtejshëm të saj.
Meta: Rasti konkret përbën jo vetëm një shqetësim të madh publik me ndjeshmëri të lartë, por ai ka tërhequr edhe vëmendjen e aleatëve dhe partnerëve tanë strategjikë në veçanti të Shteteve të Bashkuara të Amerikës, si dhe agjencive ndërkombëtare ligjzbatuesve. Janë ngritur pikëpyetje për seriozitetin e institucioneve shqiptare në luftën kundër krimit të organizuar dhe fenomenit të trafikimit të drogës, duke dëmtuar njëkohësisht edhe imazhin e vendit tonë.
Nishani: Çështja e diskutuar paraqitet shumë problematike dhe komplekse dhe me rrezikshmëri të lartë jo vetëm për mungesën e deri më tanishme të rezultateve konkrete në luftën kundër krimit, trafikut të narkotikëve, pastrimin e parave por edhe për imazhin e shtetit shqiptar”. Fakti që partnerët tanë dhe agjencitë ndërkombëtare ligjzbatuese janë interesuar për zgjidhjen sa më të shpejtë të saj dhe kanë shprehur shqetësimin disa herë, ilustron përmasat e mëdha që ajo mbart jo vetëm duke cenuar sigurinë tonë kombëtare duke kapërcyer edhe kufijtë e vendit tonë.
Nishani: Kjo mbledhje ishte e domosdoshme dhe e rëndësishme, sepse ajo u fokusua jo vetëm te rrezikshmëria e fenomenit të narko-trafikut, por edhe te nevoja për një koordinim sa më të mirë e të efektshëm dhe rrijes së përgjegjshmërisë së të gjitha institucioneve ligjzbatuese në raport me përgjegjësitë e tyre institucionale.
*Njoftimi i plote i Presidencës
