Një 48-vjeçar është arrestuar nga policia pasi ka kërcënuar me armë zjarri punëtorët e një firme ndërtimi. Policia i ka sekuestruar atij një armë zjarri kallashnikov.
Sipas uniformave blu, pas marrjes së njoftimit për një konflikt në ambientet e një kompleksi, kanë organizuar dhe finalizuar operacionin policor të koduar “Prevention”.
Mësohet se është bërë i mundur arrestimi i shtetasit L.L., 48 vjeç, banues në Tufinë për veprat penale “Kanosja”, “Prodhimi dhe mbajtja pa leje e armëve luftarake dhe e municionit”, dhe “Prishja e rendit dhe qetësisë publike”.
Ky shtetas, gjatë një konflikti për motive pronësie, në ambientet e një kompleksi, ka kanosur me armë zjarri, punëtorët e një firme ndërtimi.
Materialet procedurale i kaluan Prokurorisë pranë Gjykatës së Shkallës së Parë Tiranë, për veprime të mëtejshme./Opinion.al
