Mundësi ruso-shqiptar Islam Dudaev ka arritur një tjetër fitore të madhe, duke marrë medaljen e artë në stilin e lirë gjatë eventit për Çmimin e Madh të Spanjës në peshën deri në 70 kilogramë. Ky lajm është shpërndarë nga Federata Shqiptare e Mundjes (FSHM) përmes një postimi zyrtar, ku përshëndetet 30-vjeçari Dudaev për paraqitjen dhe rezultatet e arritura.
“Islam Dudaev fiton një tjetër medalje të artë, këtë herë në ‘Grand Prix Madrid’. Me një paraqitje të shkëlqyer në çdo ndeshje, Islam Dudaev dëshmoi sërish se është një kampion i vërtetë, duke treguar forcë, teknikë dhe një shpirt luftarak që frymëzon të gjithë”, shkruan FSHM në postimin e saj.
Ky është një tjetër sukses i rëndësishëm për Dudaev, i cili së bashku me Chermen Valiev ka shkruar historinë për mundjen shqiptare. Të dy mundësit, të natyralizuar shqiptarë, janë medalistët e parë olimpikë të Shqipërisë, pasi secili ka fituar medalje bronzi në Lojërat Olimpike të “Parisit 2024”.
Vetëm disa ditë më parë, Chermen Valiev mori medalje ari në Kampionatin Botëror të Ushtrisë në Gjermani, ku u shpall gjithashtu mundësi më i mirë i aktivitetit, duke arritur pikët maksimale teknike.
Në Madrid Shqipëria u përfaqësua me Islam Dudaev në peshën deri në 70 kg, ku ka dominuar të 5 ndeshjet e zhvilluara dhe duke marr medaljen e artë. Në edicionin e 23-të të Çmimit të Madh të Spanjës, mbajtur në Madrid, morën pjesë mbi 200 sportistë nga 35 vende të ndryshme të botës.
