Aktualitet

Kaloi me debate vetingun në KPK, Komisioneri kërkon shkarkimin e gjyqtares


Bëhu pjesë e Grupit Zyrtar të Opinion.al
>> KËTU <<
               Publikuar në : 16:25 - 05/10/20 |
Al Do

Komisioneri Publik ka kërkuar shkarkimin e gjyqtares së Apelit të Tiranës, Elona Toro, duke ankimuar vendimin e shkallës së parë të vetingut që e kishte konfirmuar atë më parë në detyrë.

Komisioneri Publik ka konstatuar se përfundimet e arritura nga Komisioni i Pavarur i Kualifikimit për konfirmimin në detyrë të gjyqtares Elona Toro, janë rrjedhojë e një hetimi jo të plotë administrativ.

Ai vlerëson më tej se gjyqtarja nuk arrin nivel të besueshëm për konfirmimin në detyrë.

Elona Toro u konfirmua në detyrë më datë 17 qershor 2020, pasi shumica e trupit gjykues vlerësoi se gjyqtarja e Apelit Tiranë arriti nivel të besueshëm në vlerësimin e pasurisë dhe në kontrollin e figurës, si dhe një nivel të mirë kualifikues në vlerësimin e aftësive profesionale.

Por vendimi nuk ka kaluar pa debate. Trupi gjykues i Komisionit të Pavarur të Kualifikimit u nda në qëndrime për gjyqtaren e Apelit të Tiranës. Ndërsa kryesuesja Firdes Shuli dhe relatorja Pamela Qirko u bindën nga shpjegimet e Toros, anëtarja në pakicë, Etleda Çiftja argumentoi se gjyqtarja nuk arriti të provojë burimin e ligjshëm për disa dhurime dhe një hua në vlera të konsiderueshme.

Sipas anëtares Çiftja, gjyqtarja Toro ka kryer deklarim të pasaktë për burimet e ligjshme që kanë shërbyer për blerjen e një apartamenti me sipërfaqe 112.7 m2 në Tiranë, të porositur në vitin 2009 me vlerë 135 mijë euro si dhe “nuk ka përdorur burime të ligjshme për kryerjen e të gjitha pagesave”.

Elona Toro (Stavri) e ka nisur karrierën në sistemin e drejtësisë në vitin 2000 dhe ka punuar për 16 vjet pranë Gjykatës së Tiranës. Në vitin 2016, ajo u emërua gjyqtare pranë Gjykatës së Apelit të Tiranës, detyrë të cilën e kryen edhe aktualisht.

Tashmë karriera e saj në gjyqsor do të vlerësohet në Kolegjin e Posaçëm të Apelimit, i cili është shkalla e dytë e vetingut, ku shqyrtohen ankesat për vendimet e KPK. /Opinion.al

Pas