Ministri i Drejtësisë Ylli Manjani thotë se një listë me prokurorë e gjyqtarë po hetohet nga inspektoratet e Ministrisë së Drejtësisë dhe Këshillit të Lartë të Drejtësisë, pas indicieve të Inspektoratit të Deklarimit dhe Kontrollit të Pasurive për parregullsi.
“Sigurisht që ka emra të tjerë. Po bashkëpunojmë me Inspektoratin e Lartë të Deklarimit të Pasurive sepse ata e nisin procedurën e verifikimit të aseteve. Ka disa vështirësi ligjore, ka disa vështirësi teknike por sidoqoftë ka një listë jo të vogël më gjyqtarë që po inspektohen nga te dyja inspektoratet, jo thjesht nga inspektorati i Ministrisë së Drejtësisë”, – u shpreh Manjani për Report TV.
“Nuk kam ndonjë konstatim të veçantë për x prokuror apo për y prokuror përfshirë këtu dhe Prokurorin e Përgjithshëm i cili është në krye të detyrës dhe ka gjithë mbështetjen time për çdo lloj ndërhyrje të kësaj natyre brenda radhëve të prokurorisë, në radhët e gjyqësorit, gjithashtu edhe në radhët e ekzekutivit kudo qoftë dhe për çdo lloj arsye”, tha Manjani.
Deklaratat vijnë pasi dy prokurorë janë arrestuar në dhjetë ditët e fundit. /Dita/
