Izraeli nuk ka përjashtuar një sulm të mundshëm ndaj infrastrukturës bërthamore të Iranit gjatë muajve të ardhshëm, pavarësisht mesazhit të Trump për Netanjahun se për momentin nuk do të mbështeste një lëvizje të tillë. Këtë e thonë një zyrtar izraelit dhe 2 burime të tjera të afërta me çështjen, për agjencinë e lajmeve Reuters. Autoritetet izraelite janë zotuar të pengojnë Teheranin të ndërtojë armë bërthamore dhe Netanjahu këmbëngul se çdo negociatë me Iranin duhet të çojë në ndërprerje të plotë të programit bërthamor.
Përgjatë muajve të fundit, Izraeli i ka propozuar administratës Trump një seri opsionesh për të sulmuar infrastrukturën Iraniane, përfshirë disa gjatë pranverës dhe verës, sipas burimeve. Planet përfshijnë ndërthurje të sulmeve ajrore dhe operacione komandoje që siç thonë, mund të reduktojnë aftësinë bërthamore te Iranit. Nju Jork Times raportoi të mërkurën se Trump i ka thënë Netanjahut më herët gjatë muajit, se dëshiron t’i japë prioritet bisedimeve diplomatike me Teheranin dhe se nuk do të mbështesë një sulm ndaj infrastrukturës bërthamore, brenda një kohe të shkurtër.
Por siç raportohet, zyrtarët në Tel Aviv besojnë tani se ushtria e tyre mund të ndërmarrë një sulm të kufizuar ndaj Iranin, që do të kërkonte më pak mbështetje amerikane. Një sulm i tillë do të ishte më i vogël nga ai që Izraeli kishte propozuar fillimisht.
Nuk është e qartë nëse Netanjahu do të vënë zbatim synimet, veçanërisht teksa SHBA është angazhuar në bisedime me Iranin. Një lëvizje e tillë do të zemëronte Trump dhe mund të vinte në rrezik mbështetjen për Izraelin.
