Detaje të reja janë zbardhur nga mediat italiane për çiftin nga Vora, Shpëtim dhe Teuta Pasho, që u gjetën të copëtuar në katër valixhe të premten pranë autostradës Firence-Pisa-Livorno.
Corriere della Sera shkruan se 2 nëntorin e vitit 2015, ditën e zhdukjes së tyre, çifti Pasho kishte shkuar në burgun Sollicciano për të marrë të birin, Taulant Pasho, që atë ditë do të lirohej, pasi kishte vuajtur dënimin 4-vjeçar.
Tashmë, shkruan media italiane është shpallur në kërkim në të gjithë botën Taulanti 33 vjeç, pasi dyshohet se është personi i fundit ose një nga personat e fundit që ka takuar prindërit e tij, Shpëtimin dhe Teuta Pasho, 62 dhe 60 vjeç, kur ishin ende gjallë.
Hetimet
Sipas hetuesve, Taulant Pasho mund të jetë çelësi për të zbuluar misterin e vdekjes së prindërve të tij që mbërritën nga Shqipëria për ta takuar dhe u zhdukën në të njëjtën ditë kur djali i tyre fitoi lirinë.
Hetimet e kryera nga karabinierët e njësisë hetimore nën komandën e Nënkolonelit Carmine Rosciano, ndjekin disa drejtime. Një nga pistat ku po hetohet është një hakmarrje e mundshme ndaj Taulantit, një djali problematik, i cili mund të ketë pasur kontakte me krimin e organizuar.
Sipas Saverio Fortunato, rektori i Institutit Italian të Kriminologjisë, prapa ritualit të tmerrshëm të copëtimit të trupave, ekziston një mesazh drejtuar njerëzve pranë viktimave, të afërmve, anëtarëve të familjes ose miqve.
Trupat e tyre u gjetën të masakruar dhe copëtuar në katër valixhe në kopshtet dhe hendekët e Sollicciano. Valixhja e katërt u gjet dje, disa dhjetëra metra larg tre valixheve të tjera.
Mjekësia ligjore e Romës më vonë konfirmoi se mbetjet kockore i përkisnin babait. Ndërsa në lidhje me identitetin e nënës nuk ka ende prova shkencore që provojnë se është 55-vjeçarja Teuta Pasho./Opinion.al
