Kompozitori i njohur dhe ish-deputeti i Partisë Socialiste Limoz Dizdari ka qenë i pranishëm në tryezën e opozitës dhe Aleancës për Mbrojtjen e Teatrit me temë “Arti në mbrojtje të demokracisë”, ku ka folur gjatë duke u shprehur pro djegies së mandateve nga ana e opozitës.
“Unë vlerësoj vendimin tuaj për të djegur mandatet. Nuk ka pasur rrugë tjetër. Por më çudit fakti se përse ndërkombëtarët janë kundër. Është një pyetje që nuk i jap dot përgjigje. Sigurisht unë kam mendimin tim lidhur me këtë çështje, por arsyetimet e tyre duhet të jenë të bazuara”, ka thënë Dizdari.
Ai e nisi fjalën duke u ngritur në këmbë dhe duke risjellë në kujtesë debatet e viteve ‘2000 për shembjen e Teatrit Kombëtar, që edhe në atë kohë kërkohej nga Edi Rama, por u kundërshtua nga Fatos Nano.
“Unë do flas në këmbë. Jam si puna e gjelit që kur këndon i mbyll sytë dhe unë flas në këmbë. Unë jam mbajtur për një të majtë ekstrem. Rama donte ta prishte Teatrin sepse donte një teatër të ri. Më tha që më ka premtuar qeveria greke që do ta ndërtojë. Dhe unë i thashë që në Vuno kemi një këngë: Mblidhuni mor gra dhe më qani burrin se unë po iki në dasmë. I thashë e këndoni këtë këngë andej nga fshati juaj?!”, ka thënë ndër të tjera Dizdari.
Limoz Dizdari, përveçse është një prej kompozitorëve më të njohur dhe më prodhimtar shqiptar, ka qenë deputet i Kuvendit të Shqipërisë në dy legjislatura, në vitet 1997-2005. Aktualisht ai jeton në Sarandë, ku tha se “jetoj si Robinson Kruzo”./Opinion.al
