Në një material të botuar nga revista “Monitor”, e cila iu referohet shifrave, kompania, Info-Telecom që u krijua në vitin 2009, pati një rritje të fortë në vitin 2013, me një qarkullim vjetor nga 3.6 në 14.4 miliardë lekë, duke u pozicionuar e 13-ta, në renditjen totale të sipërmarrjeve më të mëdha në vend, për nga xhiroja vjetore. Ndërkohë, në vitin 2014, kompania realizoi sërish një rritje prej 10%, në 15.8 miliardë lekë, duke ia kaluar nga qarkullimi vjetor edhe AMC apo edhe Albtelecom e duke mbetur vetëm pas “Vodafone Albania” në tregun e telefonisë shqiptare. Nëse në vitet e para rritja e kompanisë ka qenë me 3% e më pas me 6%, në vitin 2014, kjo kompani arrin në rritje 10%. Si është e mundur, që një kompani me 25 punonjës, të arrijë të ketë një xhiro vjetore më të madhe se kompania e parë celulare në Shqipëri e cila ka një staf disa herë më të madh se Info-Telecom? Tabela më poshtë, tregon ecurinë e kësaj kompanie në vitet e fundit dhe renditjen e saj në treg.
