Enkelejd Alibeaj, pas mbylljes së Komisionit Hetimor për zgjedhjet e 25 prillit, në një deklaratë për mediat tha se PS e ka braktisur këtë komision 3 herë. Sipas kryetarit të Komisionit Hetimor, mazhoranca synon që të pengojë hetimin e zgjedhjeve të 25 Prillit.
“Kanë bojkotuar 3 herë për të penguar punën e komisionit. Madje, Kuvendi ndërpreu edhe sinjalin televiziv, që ndërpritet vetëm kur përfundojnë punimet e komisionit”, u shpreh Alibeaj.
“Sot duhej hetuar veprimtaria e patronazhistëve, u paraqit panorama e plotë e punës së tyre, u paraqitën të dhënat lidhur me shpërdorimin e parasë publike. Por, kjo është mënyra se si pushteti kërkon të vendosë pengesa për funksionimin e çdo komisioni hetimor”, shtoi deputeti demokrat.
Lidhur me ndërprerjen e sinjalit nga administrata e Kuvendit, Alibeaj u shpreh se administrata është futur në mënyrë të paligjshme në mbledhje.
“Administrata e Kuvendit u fut në mënyrë kamikazë për të ndërprerë punën e komisionit. Duan të minojmë procesin e hetimit, por nuk kanë për t’ia dalin, dëshmitarët dhe provat do të merren dhe do të thirren në bazë të ligjit. E drejta e çdo deputeti për te kërkuar prova dhe dëshmitarë miratohet pa votim, PS kërkon që këtë të bej më votim me shumicën e socialistëve”, tha Alibeaj.
Komisioni Hetimor për zgjedhjet e 25 Prillit u mblodh sërish këtë të mërkurë. Megjithatë, është shoqëruar me debate, madje edhe me largimin e mazhorancës me pretendimin se është shkelur rregullorja.
Mbledhja e sotme u pasua me një incident mes kryetarit të komisionit, Enkelejd Alibeaj dhe drejtoreshës së Shërbimeve në Kuvend, Lefterie Luzi, e cila kërkoi ndërprerjen e Komisionit pasi u largua mazhoranca. Por kjo u kundërshtua nga Alibeaj. Pavarësisht kësaj, nga ana e Kuvendit u ndërpre sinjali i transmetimit për media.
