Pesë alpinistë kanë ndërruar jetë, pasi u goditën nga një stuhi bore në majën më të lartë në Evropë, Elbrus, në kufirin e Rusisë me Gjeorgjinë.
Njoftohet për mediat se vdekja e pesë alpinistëve u konfirmua nga Ministria Rajonale e Emergjencave e Rusisë.
Ndër të tjera bëhet me dije se 14 anëtarë të tjerë të grupit janë shpëtuar në kohën kur moti ishte me erë të fuqishme, dukshmëri të vogël dhe temperatura kishte zbritur deri në -20 gradë.
Alpinistët bënë një thirrje për ndihmë pas orës 5 të pasdites së të enjtes, kur ishin në një lartësi prej rreth 4.800 metrave, shkruan Independent.
Sipas mediave të huaja nga personat e shpëtuar, 11 prej tyre u dërguan në spital me lëndime por jashtë rrezikut për jetën.
Ndërkohë që Denis Alimov, i cili ofroi ndihmë për organizimin e ngjitjes, i tregoi agjencisë TASS për tmerrin e përjetuar nga grupi.
Gjatë ngjitjes, një grua nuk u ndie mirë dhe u kthye bashkë me njërin nga udhërrëfyesit, tha Alimov, por vdiq më vonë në duart e tij.
Grupi tha se dy anëtarë vdiqën nga të ftohtit, ndërsa dy të tjerë e humbën vetëdijen dhe vdiqën teksa po silleshin poshtë malit./Opinion.al
