Historia e Arbër Likajt është bërë publike nga mediat e huaja, të cilat shkruajnë se i ardhur nga Elbasani, një qytet në qendër të Shqipërisë, me profesion inxhinier kompjuteri ishte vendosur në Buenos Aires për dekadën e fundit, bashkë me bashkatdhetarë të tjerë.
Arbër Likaj nuk kishte një aktivitet të regjistruar në AFIP, nuk ishte një punëdhënës, nuk kishte një kompani që bënte punë. Dhe mesa dukej kishte shkuar për diçka tjetër në Argjentinë.
Një çështje penale, në fund të vitit 2013, e shënoi si një person i kërkuar në Regjistrin Kombëtar të Recidivizmit.
Ai akuzohej se ishte “truri” i një përpjekjeje për të trafikuar kokainë midis Athinës dhe Romës. Më shumë se 11 kilogramë u zbuluan midis majit dhe qershorit të atij viti në aeroportin Ezeiza.
Historia e tij përfundoi në mars 2021. Pasi u kap, Arbëri u dënua përfundimisht më 26 shkurt. Ai u gjykua me të shkurtuar dhe gjykata vendosi ta dënoi shqiptarin me 4 vite e 10 muaj burgim.
Por sot, Arbër Likaj kërkon të shkojë në shtëpi. Mediat argjentinase shkruajnë se ai ka kërkuar që të deportohet në Shqipëri, për ta vuajtur dënimin në vendin e tij, pasi një ligj i lejon të huajt e dënuar në Argjentinë të deportohet në vendin e origjinës me kushtin e moskthimit.
Por gjykata e ka rrëzuar këtë kërkesë, ku në fakt pretendimet e Likajt ishin me të vërtetë dramatike: Bashkëshortja, pra nëna e fëmijëve të tij, ka kancer të avancuar.
Likaj është i martuar në Shqipëri dhe thotë se nga kjo martesë ka 2 fëmijë, të cilët kanë qenë në kujdesin e së ëmës. Por fatkeqësisht gruas i është zbuluar një kancer dhe kërkon trajtim me kimioterapi. Dhe e gjitha kjo ka ndikuar tek familja e tij, jo vetëm tek gruaja, por edhe tek fëmijët e mitur, 7 vjeç dhe 19 muajsh.
Ai paraqiti një raport të rëndë mjekësor, i cili tregon se gjoksi i prekur i gruas duhet të hiqet për të ndjekur trajtimin. Një raport tjetër i dërguar nga Shqipëria siguron se djali i tij po përballet me probleme psikologjike për shkak të situatës.
Të gjitha këto nuk u pranuan si arsye nga gjyqtari i cili doli në përfundimin se gruaja dhe fëmijët e Arbër Likaj janë në kujdesin e duhur në vendin e tyre./Opinion.al
