Është shoqëruar me debate mbledhja e Komisionit Hetimor për 25 Prillin. Komisioni dështoi për të miratuar me konsensus planin e hetimit për këtë proces të prezantuar nga Partia Demokratike.
Me 7 vota kundër të PS, 3 pro të PD-së dhe një abstenim të LSI-së, mazhoranca dhe opozita nuk ranë dakord për planin hetimor.
Sakaq, kryetari i Komisionit Enkelejd Alibeaj u shpreh se përsa kohë që nuk u miratua plani, nuk mund të deklarohet fillimi i hetimit dhe sipas tij praktikisht puna e Komisionit hetimor mbyllet këtu.
Debati
Alibeaj: “Përsa kohë që nuk miratohet plani i hetimit nuk mund të deklarohet fillimi i hetimit, që praktikisht hetimi i këtij komisioni përfundon këtu dhe përderisa përfundon këtu, përgjegjësia ligjore dhe politike është në sytë e të gjithë publikut. Derisa të ketë një reflektim nga anëtarët që kanë votuar kundër, fatkeqësisht më duhet të deklaroj këtë që sapo thashë.
Këtu ndërpritet veprimtaria hetimore, është e qartë përse. Skenari u demaskua, nuk duan të hetojnë dhe të bëjnë publike atë që ka ndodhur në kundërshtim të ligjit dhe të votimit të kuvendit. Përsa kohë që plani i hetimit nuk mund të vazhdojë, seanca mbyllet dhe do të ketë njoftim edhe për seancën e radhës.Fatkeqësisht ky ishte fundi i parashkruar” deklaroi ai duke u ngritur për t’u larguar nga salla.
Gogu: Zoti kryetar mos u largoni nga Komisioni.
Alibeaj: Ne po ikim, ju mund të këndoni tani.
Ndërkohë pas diskutimeve komunikohet nga stafi se do të mbyllet transmetimi, por menjëherë reagon me tone të ashpra Nasip Naço.
Naço-stafit: “Ke frikë nga ai ti? Provo dhe mbylle transmetimin, hë provo…
Ervin Salianji: Pse kërcënon…
Naço: Jo mo, le ta provojë…
